Hân-tepesi'nde vücûd-i vücûh-i mehâzîr ile ikāmet mümteniʿ olduğundan, İsakçı tarafına ʿazîmet savâb-nümây-ı erbâb-ı elbâb olmuşidi. Yaş muhâfazasına taʿyîn olunan Abaza Paşa maʿiyyetine Nüzul Emîni taʿyîn olunup, rûz-merre tevzîʿ-i akvât içün yedine yirmi beş bin guruş teslîm ve düşmene yâr ve nihânî ittifâk ile hevâdâr olan reʿâyânın ahz u istîsâlleri müşârun ileyhe ve Boğdan Voyvodası'na tenbîh ü te'kîd ve Hân-tepesi'nde mevcûd anbarların emr-i muhâfazası dahi teşyîd olunup, Hân cenâbları dahi o tarafların muhârese ve gezend-i aʿdâdan vikāyesine tergîb ve vücûh-i nevâziş ü iltifât ile tatyîb olundukdan sonra, cumâdelâhırenin gurresinde Hân-tepesi'nden fekk-i tınâb-ı ârâm ve İsakçı tarafına tahrîk-i zimâm olundu. Kesret-i bârân sebebi ile ilerüce gönderilen topların nakli müteʿassir ve şiddet-i berd meʾmûrları mütezaccir edüp, Hân-tepesi'ne beş sâʿat mesâfede çadırlarını nasb etdikleri huzûr-i Serdâr-ı ekremî'yi selb edüp, Lopoşte nâm menzilde dört gün ikāmet ve Kethudâ Bey maʿrifetiyle halka ücret vererek zikr olunan topları nakle himmet eylediler. Mevsim-i mezkûr teşrînin ibtidâsı ve bürûdetin vakt ü nemâsı olduğundan, yevmen fe-yevmen sermânın şiddeti firâvân ve ebr-i midrârın tuğyânı nümâyân olduğundan gayri, kıllet-i zehâyir ile nevʿ-i insân cins-i hayvân bî-tâb u tüvân olmalarıyla bilâ-fermân yaʿni min gayri istîzânin nâs İsakçı tarafına revân oludular. Yaş tarafına me'mûr cünd-i mevfûr dahi Nehr-i Prut kenârında ikāmet ve şiddet-i hevâyı ʿillet eyledikleri mesmûʿ olduğundan tınâb-ı ikāmetleri tefkîk ve savb-ı meʿmûrlarına tahrîk irâdesiyle [M2 48] Canik Muhassılı ʿAli Bey, maʿiyyetinde olan askeriyle taʿyîn ve bu maslahat dahi tehvîn olundukdan sonra Sadrıaʿzam li-maslahatin ikāmet etdiği mahalden refʿ-i raht-ı ârâm ve İsakçı maʿberinden güzâr ile karşu tarafa nasb-ı hıyâm eylediler.