Serdâr-ı ekrem hazretleri bâlâda tahrîr olunan sûret ile Hân-tepesi'ne ʿavdet edüp, üç-beş sâʿatden sonra Hân-ı ʿâlîşân dahi orduya vâsıl ve nasb olunan hıyâma nâzil oldu. Ferdâsı müşârun ileyh ve vüzerây-ı ʿizâm ve mîr-i mîrân ve sâyir erkân-ı devlet müctemiʿ olup, Hân cümleden evvel tahrîk-i lisân ve; “Düşmen Nehr-i Turla'yı berü geçmeden şu kadar ru'esâ ve ecnâd ile kilîd-i memleket-i Hâkānî olan Hotin'i terk ve zor görmeden asker birbirinden münfekk olarak, her biri bir tarafa müteferrik u perîşân olması beni gam-gîn ve nâlân etmişdir” kelâmını bast eyledikde, Serdâr-ı ekrem dahi Hân'ı tasdîk ve vukūʿ bulan hâlet-i müdhişeyi meşiyyet-i kazâ vü kadere taʿlîk eyledi. Esnây-ı râhda Yaş havâlîsinin muhafazasını Abaza Mehmed Paşa'ya ve bin nefer âdem tahrîriyle Sorika ve Moylova maʿberlerini Bender Sağ Kol Ağası Hacı Bey'e sipâriş ü tenbîh ve Kapucu-başılık ile kadrini terfîʿ u tenvîh etdiğini Serdâr-ı ekrem hazretleri meclisde beyân ve bu sûreti herkes istihsân eyledikleri hıtâmında, Ordu-yi hümâyûn'un meks ü hareketi husûsları dermeyân kılınup, hulûl-i şitâdan mukaddem kebîr topların İsakçı'ya îsâli karar-gîr olmağla Topçu Ocağı'nın İsakçı'ya hareketi irâde ve muhafazasına Anadolu Vâlîsi Feyzullah Paşa, eyâleti askeriyle taʿyîn ve Karaman Beylerbeyisi [M2 47] Hazînedâr ʿAli Paşa dahi Yaş tarafına me'mûr Abaza Paşa maʿiyyetine gitmek hususu tahsîn olunup, meclise hıtâm ve meşverete encâm verildi. Bundan sonra taraf-ı hümâyûndan Silahdâr Ağa vesâtatıyla Hân-ı âlîşân tarafına şeref-resân-ı vürûd olan teşrîfât-ı seniyye ki, serâsere kaplu semmûr kürk ve kalpak ve murassaʿ sorgûc ve şemşîr ve tirkeşden ʿibâret idi. Huzûr-i Serdâr-ı ekremî'de ilbâs ü taklîd ile şeref-mend kılındıkdan sonra, ordusu tarafına sevk-i semend eyledi.