Müşârun ileyh Ordu-yi hümâyûn ile Dâvud Paşa Sahrâsı'ndan nehzat ve ru'esâ ve tavâyif-i askerîyi mazhar-ı nevâziş u rağbet ederek Bender'e ve andan Hân-tepesi'ne ʿavdet edüp, kâffe-i ahvâlde hılâf-ı emr-i hümâyûn vazʿ u harekete ictisâr ve lâzime-i Serdârî-yi askerde zerretün-mâ kusûr ve tuvânî ihtiyâr etmemiş iken, bir târîhde ictimâʿ etmemiş askerin zehâyiri tedârükünde terk-i hâb-ı nûşîn ve kıllet-i zehâyir zâhir olduğu hîn baʿzan nısf ve baʿzan bedel ile idâre-i akvât-ı muvahhidîn etmiş iken, nazm: İzâ lem yekün ʿavnun minallâhi li'l-fetâ Fe-evvelü mâ yücnî ʿaleyhi ictihâdüh mefhûmu üzere saʿyi hebâ ve himmet-i sebeb-i cefâ olup, cengi, luʿb cengi ʿaddeden başıboş askerin şedâyid-i sefere ʿadem-i tahammülleri ve zahîre behânesiyle gaybet u firârları müşârun ileyhin sû-i tedbîrine haml ü isnâd ve ʿâlem-gîr olan medâyihi nekāyis u muʿâyebe ibdâl ve hiddet-i mizâc u nâs ile ʿadem-i imtizâc zemîmelerini neşr u işâʿa ile kendü seyyi'âtların mestûr ve giderek tekavvul eyledikleri ekâzîb ü erâcîf izhâr-ı gazab u tehevvürde Hâkān-ı zemânı maʿzûr, Ve ʿale'l-mürîbi şevâhidün lâ tüdfaʿu mısraʿ-ı meşhûrunu hakkında mezkûr eyledi. Binâʾen ʿalâ-zâlik müşârun ileyh Dimetoka'ya ʿazîmet niyyeti ile İsakçı'dan hareket esnâsında iʿdâmına irâde teʿalluk edüp, Kapucu-başı Şîrîn Halîl Ağa, hatt-ı nihânî ile bu maslahata taʿyîn olunup, müşârun ileyh Edirne'ye mütekārib oldukda, Edirne Bostancı-başısı İsmâʿîl Ağa'ya Kapucu-başı kazıyyeyi sırran ifâde ve tarîk-i iʿdâmını bi'l-istişâre âmâde etdikden sonra, birkaç sâʿat mesâfeden Bostancı-başı istikbâle şitâb ve lede'l-mülâkāt serâya nüzûlünü [M2 43] sûret-i ikramda işrâb edüp, mûmâ ileyh gars-i yemîni olduğundan başka, mülâhazaya zâhib olmayup, dâʿvetini temahhuz-i ʿubûdiyyete haml ile serâya nüzûl ve birkaç dakīka hulûlünden kaziyyeyi ifâde ile o düstûru vakūru merciʿ-i aslîsine mevsûl ve tarîf ü telîd ve ʿatîk u cedîd her neye mâlik ise mübâşir-i merkūm bi'l-cümle kabz ve Âsitâne'ye îsâl ve teslîm-i eyâdî-yi emânet-kârân-ı Devlet-i ebed-ittisâl eyledi.