Hotin Kalʿası'nın istihlâsı ve Kamaniçe ve İzvanice taraflarına baʿzan asker taʿyîni ile cünûd-i muvahhidînin galebesi mukaddemâ sâmiʿa res-i hümâyûn olduğuna binâʾen, ugūr-i dîn-î mübînde sebkat eden hidmetlerine mükâfât ve bundan sonra zuhûra gelecek ikdâm ü himmetlerine sebeb-i şevk-i bî-gāyât olmak irâdesiyle ber-mûceb-i Rûz-nâmçe Serdâr-ı ekrem ve Hân ve sâyir vüzerâ ve rû'esâya teşrîfât ve ʿatiyyât tertîb olunup, mikdâr-ı vâfî hazîne ile taraf-ı [M2 42] müstecmiʿu'ş-şeref-i Şehriyârî'den Silahdârlık hidmet-i menîʿalarıyla şeref-yâb olan Mehmed Emîn Ağa taʿyîn ve ve tayy-ı menâzil ile Hân-tepesi'ne tekarrubu vâsıl-ı semʿ-i yakīn olduğuna binâʾen, müşârun ileyhi yemeklik yerinden ricâl-i bâb Mehter-hâne ile istikbâl ve Kāyim-makām Paşa haymesinin cânib-i yemîninde nasb olunan obaya tenzîl ile resm-i mihmân-nüvâzî hakkında ikmâl ve müstashabı olan eşyâ vü nukūd Ordu-yi hümâyûn hazînesine nakl u idhâl olundu.