Müşârun ileyh metâʿib-i hatt-ı tirhâl-i seferiyye ile zaʿîfu'l-hâl olup, Bender'den Hân-tepesi'ne geldikde zaʿf-ı vücûdu iştidâd ve ʿilleti giderek imtidâd bulup, kışlak tarafına Ordu-yi hümâyûn'un ʿavdeti vakti dahi nâ-maʿlûm ve giderek esbâb-ı râhat ü huzûru maʿdûm olduğundan, bi'l-istîzân Nehr-i İsakçı Kasabası'na revân olmuşidi. Birkaç gün kasaba-i mezkûrede ikāmet ve şehr-i mezkûrun yirmi beşinci isneyn günü sefer-i âhiret eyleyüp, Sultân ʿOsmân Câmiʿ-i şerîfinde Sadr-ı esbak Semîn İbrâhîm Paşa kurbunda o hâyiz-i kâffe-i ʿulûm u fünûn medfûn kılındı. Müşârun ileyh Su Nâzırı Altunuçok Mehmed Ağa'nın sulbünden yüz on sekiz târihinde ketm-i ʿademden sâha-i vücûda kudûm ve ʿunfuvân-ı şebâbında vaktini hasr-ı envâʿ-ı ʿulûm edüp, Neylî Ahmed Efendi'den ve Mudurnulu Mehmed Efendi'den her fennî tarîkı üzere ahz u telakkī ve gûn be-gûn derece-i istiʿdâdı kesb-i terakkī ve yirmi beş târihinde mülâzım ve kırk dört senesinde Şeyhulislâm Mirzâ-zâde Mehmed Efendi'den bi'l-imtihân rü'ûs ahzıyla mazhar-ı mekârim olmuşidi. Dâmâd-zâde Feyzullah Efendi Meşîhati'nde Kudüs'e hâkim ve inkızây-ı müddet-i hükümet ile İstanbul'a kādim oldukda, Huzûr Dersi'nin birinde Mukarrir olup, siʿa-i ʿilmi maʿlûm-i hazret-i Cihândârî olmağla, Şâm Pâyesi'yle dil-nüvâzende-i ikrâm ve yetmiş dörtde Medîne-i münevvere Kazâsıyla ruhsây-ı Ravza-i Mutahhara-i Seyyidü'l-enâm oldu. Seksen bir sâlinde İstanbul Pâyesi'ni ihrâz ile bâlâr ve ser-menzil-i imtiyâz ve bir seneden sonra Ordu-yi hümâyûn Kadılığı'yla mazhar-ı sunûf-i iʿzâz olup, seksen üç evâyilinde Anadolu pâyesi'yle kadri efzûn ve târîh-i mezkûrda zâyik-i merâret-i reybe'l-menûn oldu. Müşârun ileyhin [M2 37] Sûre-i Bakara evâyiline yazdığı hâşiye-i Beyzâvî müsellem-i fuhûl ve fünûn-i sâyireye müteʿallık risâleleri mütedâvel ü makbûldür. Baʿzı Türkî eşʿâr inşâdına dahi meyl ü rağbet ve ʿAbdî mahlası ile âzmâyiş-i maʿrifet eylep, Hotin Kalʿası tahlîs olundukda, inşâd etdiği târîhdir: 'Abdiyâ târîh-i kahrın dedi ehl-i ʿarş u ferş, Moskovu kıldı müdemmir seyf-i Sultân Mustafa (مسقوى قلدى مدمر سيف سلطان مصطفى)