Müşârun ileyh yetmiş üç târihinde mazhar-ı kahr-ı sâhib-i ʿasr olan el-Hâc Ahmed Paşa'nın mahdûmu olup, maskat-i re'sî olan Oltu'da mukīm iken bâ rutbe-i Mîr-i mîrânî Çıldır Eyâleti ile nâyil-i emânî ve yetmiş beş târihinde Vezîr ve üç sene bilâ-infisâl Gürcistan Serʿaskerliği'yle nâm ü şânı felek-mesîr olmuşidi. Seksen iki târîhinde Köstendil Sancağı ilhâkıyla Selânik'e mutasarrıf ve seksen üç muharreminde tevcîh olunan Özi Muhâfızlığı'ndan me'mûriyyeti Hotin'e munsarıf olup, vech-i meşrûh üzere terk-i ʿâlem-i fânî ve ʿazm-i semt-i câvidânî eyledi. Müşârun ileyh fart-ı cesâretle maʿrûf ve hilm ü vekār ile me'lûf, reʿâyâ-perver ve dâd-güster ve beyne'l-vüzerâ muvakkar u muʿteber, şecâʿatde kahramân ve ʿuluvv-i himmet ü ikdâmda Rüstem-i dâstân, vechi sabîh ve sadrı fesîh ve iʿtikādı sahîh bir Vezîr-i sâhib-i tedbîr idi. Biz yine sadede gelelim, Hân-ı [M2 31] ʿâlî-şân maʿiyyetine me'mûr tavâyif-i askerî ve Bâşbûğ nasb olunan Vezîr ʿAli Paşa ve sâyir vüzerây-ı ʿizâm ve mîr-i mîrân-ı kirâm Yaş Kasabası'nda ictimâʿ ve ahvâl-i aʿdâya ıttılâʿ ʿakabinde Hotin cânibine ʿazîmet ve hasım ile tarh-ı bezm-i rezm etmek fikrinde iken, nâ-gâh o tarafdan bozgun askeri zuhûr ve me'murları güm-kerde-i râh-ı şuʿûr edüp, ne hâl ise mezkûrlar taʿvîk ve etrâfa münteşir olanları cemʿ içün ulaklar tefrîk olunup, anlar dahi gelüp, orduya iltihâk ve baʿzı deliller istintâk olundukda, düşmen-i bî-mîsâk Hotin'in berü tarafında vâkiʿ Ak-mescid nâm mahalle dek meterisler hafr edüp, Katana ve Kazak tâyifesini karagola taʿyîn ile rasad-ı bîn-i şikāk oldukları Serdâr-ı ekrem tarafına inhâ ve bir mikdâr zehâyir ve mühimmât istidʿâ eylediler. Üç bin kadar dalkılıç ve mühimmât ve zehâyir ve vücûh-i sâyire ile imdâd olunduğundan gayri elli bin guruş dil ve kelle getürenlere vermek üzere irsâl olunup, bir ân akdem aʿdây-ı bed-nihâd üzerine sevk-i ketâyib ü ecnâd etmeleri bâbında cümlesine hitâben emr-i celîlü'l-iʿtibâr ısdâr olunmuşidi. Bu tertîbât vusûl bulmazdan mukaddem Mîr-i mîrân'dan Çelik Paşa hazînedârı olan ʿAli Paşa, kendü askeri ve maʿiyyetine müretteb sâyir asâkir ile taʿyîn olunup, küffârın katanalarına Kanlı-köprü nâm mahalde musâdefe ile ekserîsin kantara-i tîg-i tâb-dârdan imrâr ve birkaç meterislerini ârâm-gâh-ı cünd-i nusrat-şiʿâr eyleyüp, bakıyyesi Hotin pîrâmeninde olan sûrâh-ı tabura mâr-dem-i bürîde gibi insiyâb eylediler. Taraf-ı İslâm'dan ser-zede-i zuhûr olan cür'et ü ikdâm bâʿis-i havf u haşyet-i aʿdây-ı li'âm olup, kalʿa tarafından şeb-hûn ve o tarafdan hücûm ile halleri dîger-gûn olacağını kavmiyle müzâkere ve meterislerini terk ve mugādere ve ehâlî-yi kalʿa bu vechile vâreste-i iztırâb-ı muhâsara olup, düşmen dahi Kireç-hâne verâsında ihdâs etdiği istihkâmâta saʿy-ı pûç ile vülûc ve sedd-i bâb-ı hurûc eyledi. Bundan sonra aʿdânın tehassun etdiği mahalle yürüyüş husûsu Hân-ı ʿâlişân ve Serʿasker Paşa ve Başbûğ ve sâyir efrâd-ı askerî ile meşveret ve cümlesi re'ylerine muvâfakat ile bi'l-ittifâk meterisler hafrına mübâşeret ve kalʿada [M2 32] ve berü tarafda olan piyâdegān zümresi meterislere teşhîn ve süvârîleri etrâfa taʿyîn olunup, bu tedbîr-i dil-pezîr düşmen-i dîne tîr-i mesmûm gibi te'sîr ve kendülerine mukaddeme-i istîsâl ü tedmîr olacağını mülâhaza ile şehr-i rebîʿulâhirın onuncu pazar gicesi meterislerden karşu tarafa mürûr esbâbının tehyi'esine şurûʿ etdikleri, maʿlûm cünd-i zafer metbûʿ oldukda ʿale's-seher hân ve vüzerâ ve sâyirleri taʿkīb ve Nehr-i Turla'da olan köprülerine dek o kavm-i müstahıkku'l-levmi taʿcîz ü taʿzîb eylediklerinden gayri, cisr-i memdûdların fesh edinceye dek vâfiri küşte-i hısâm-ı İslâm ve lağımlara taʿbiye etdikleri elli kantar barut resîde-i maʿraz-i nakl ü iğtinâm oldu.