Teferruk-i asker sebebi ile Serʿasker Paşa ve Muhafız Hasan Paşa ve on bin kadar piyâde Hotin Kalʿası'na tehassun ve her tarafda cenge teheyyüʿ ile temekkün ve düşmen-i ʿahd-şiken dahi huluvv-i meydân ve teferruk-i mübârizân sebebi ile Hotin Kalʿası'na nısf sâʿat mahalde meterisler inşâ ve toplar vazʿıyla tertîb-i levâzım hasr u ezâ etmişidi. Serʿasker ordusunda kırk pâre top ve mühimmât-ı sâyire mukaddemâ terk olunup, nakle zemân müsâʿid olmadığından kalʿada olan ehl-i İslâm mübtelây-ı endûh ü âlâm olup, düşmen ise o makūle mühimmâtın terkini hudʿa-i harbiyyeye haml ile ordusuna nakl eylemediği tehakkuk etmekle, yevm-i muhâsaranın ferdâsı Muhafız-ı müşârun ileyh ile Ordu Ağası Ser-seksonî ʿAbdullah Ağa ittifâk ve mühimmât-ı mezkûrenin kalʿaya idhâliyçün miyân-ı hamiyyete şedd-i nıtâk eyleyüp, üç bin kadar dilâverân meydân-ı ceng ü vegā ile Serʿasker ordusu yerine geldiklerinde, top ve hıyâm ve mühimmât ve sâyir eşyayı kalʿaya nakl ü idhâl ve bir hılâl taşrada terk etmemekle, nâm u şânların sahîfe-zîb-i abtâl-i ricâl eylediler. Aʿdâ kalʿa tamaʿıyla meterislerin takrîb ve on dakîka mahalde hendekler hafrıyla askerin taʿbiyye ve tertîb ve on bir kıtʿa top iʿmâl ve baş-tabya ile Hacı ʿOsmân ve Maktûl-oğlu tabyaların döğmeye iştigāl edüp, fazl-ı Hakk ile bu topların kalʿa ve ehâlîye zararı olmayup, fekat İzvance tarafında vâkiʿ Parga Karyesi altında îcâd etdiği [M2 30] hısânât-ı müstahkemenin topları, mahsûrîn-i İslâm'a iztirâb ve kemâl mertebe pîç ü tâb verüp, Hotin Muhafızı Vezîr Hasan Paşa ise himâyet-i dîn ve muhâfaza-i aʿrâz-ı Müslimîn irâdesiyle Yûsuf Paşa Tabyası'ndan ve sâyir mahallerden düşmene göz açdırmayup, top u tüfeng ile işʿal-i nâyire-i ceng ve tabyalarda olan guzâtı igrâ ile meterisleri düşmene halka-i mîmden teng edüp, muhâsaranın on birinci Pazar-ertesi günü Vezîr-i müşârun ileyh me'vâsında cüz'î râhat içün mahall-i maʿrekeden ʿavdet eyledikde, aʿdânın bir gün evvel karşu tarafa vâfir piyâdesi gelüp, irtiyâd-ı mâdan mahsûrları menʿ içün kemîn-gâhlar peydâ etdiklerini re'ye'l-ʿayn müşâhede etmekle, kendüye mahsûs tüfenglerini bir mikdâr barut ile ihzâr ve müstekar olduğu mahalden der-kemîn olan müşrikîni dâne-i tüfeng ile bî-zâr ve bir kaçını îsâl-i dereke-i nâr eylediği hâlde, aʿdâ tarafından atılan topların bir güllesi ve tüfenglerin bir dânesi ârâm-gâhları olan mahalle isâbet ve fi'l-hâl etrâfında olan barutu işʿâl ve ondan iʿmâl etdikleri memlû tüfenglere sirâyet ve kurşunun biri topuğuna râst gelüp, o hizebr-i bîşe-i celâdeti zahmdâr ve üç günden sonra ʿazm-i dâru'l-karâr eyledi.