Sadr-ı sâbık vaktinde nisâr-ı dirhem ü dînâr ile Dîvân Tercemânlığı'nı tahsîl eden Nikolaki, umûr-i seferiyyeye dâ'ir müzâkerât ile Sadrıaʿzam'a izhâr-ı maʿlûmât ve bu sebeble tahsîl-i husûsiyyet ve imtiyâzât edüp, [M2 29] ehl-i İslâm'a nazarını kec ve her mâddede girîve-kerd-i vâdî-yi ʿinâd ü lec ile tervîc-i re'y-i muʿavvec eylediğinden fazla, mukaddemâ hayâl-hâne-i fikr-i fâsidinde sûret verdiği evhâm u hayâlâtın butlânı zâhir u âşikâr ve Serdâr-ı ekrem'i bu vesîle ile hacl ve şerm-sâr etdiği ve buna dâ'ir kat'î çok mel'anete ictisâr eylediği, maʿlûm-i Şehriyâr-ı ʿâlî-tebâr olmağla, Kethudây-ı sâbık maʿiyyeti ile Âsitâne-i saʿâdet'e ihzâr olunup, Alay-köşkü altında gerdenine havâle-i tîg-i hûnhâr ve ʿibret-i hadd-i nâ-şinâsân-ı rüzgâr kılındı. Mihâl Voyvoda'nın oğlu Mihâlika Tercemânlığa intihâb ve işbu rebîʿulâhirin üçüncü günü Ordu-yi hümâyûn'a iyâb ve Tercemânlık hıdmetini iktisâb eyledi.