Müşârun ileyh yeke-tâz-i meydân-ı celâdet ve kûy-rûbây-ı fezây-ı sarâmet olup, Hekîm-zâde ʿAli Paşa merhûmun Enderûn Çukadârı iken Sivas Sahrâsı'nda zorba ve eşkıyâları tedmîrde fevka'l-me'mûl hidmet edüp, mürûr-i ezmân ile Mîr-i mîrân ve bu seferde dahi sarf-ı tâb ü tüvân ile uğûr-ı Pâdişâhî'de bezl-i mâl ü cân eylediği, Serdâr-ı ekrem hazretlerine nümâyân olmağla, câh-ı vâlây-ı Vezâret ile kadri terfîʿ ve sebkat eden hidmeti vâreste-i girih-i tazyîʿ kılındığından başka, el-hâletü hâzihî seferde mevcûd ve emvâl ü eşyâsı nehb-kerde-i düşmen-i bed-bûd olmağla, muʿtâd olan Vezâret câyizesi tarafına inʿâm ve bu vechile dahi seyrâb-ı zülâl-i ikrâm kılındı. Mîrâhûr-i Evvel iken Sadâret Kethudâlığı'na lâyık u mahal görülen el-Hâc Ahmed Ağa, muhavvel-i ʿuhde-i sadâkati olan hidemâtda ihâta-i ʿakl ü idrâki kadar kusûr etmemiş iken Ordu-yi hümâyûn'da baʿzı müteneffis, umûruna taʿarruz ve mûmâ ileyh dahi gâh teʿâruz ve gâh temâruz üzere görünüp, bu vesîle ile kevkeb-i müstaʿlî-yi ikbâli hâbıt ve giderek nazar-ı Serdâr-ı ekremî'den sâkıt olup, bu keyfiyyet maʿlûm-i hazret-i Tâcdârî ve ʿazline irâde-i seniyye cârî olmuşidi. Binâ'en ʿalâ zâlik Ordu-yi hümâyûn'a hazîne îsâl etmek me'mûriyyeti ile pâder-i rikâb olan Mîrâhûr-i Evvel Mustafa Bey'e hufyeten Kethudâlık hatt-ı şerîfi verildiyse dahi, hazîne ile ʿazîmeti zemâna muhtâc olduğundan, zikr olunan hazîne Edirne tarafında olan Kapucu-başı ʿAbdullah Ağa'ya teslîm ile verâdan îsâlini te'kîd etmek ve kendisi dahi bir ân akdem Ordu-yi hümâyûn'a ʿazîmet eylemek vasâyâsı retîme-i bâzû-yı me'mûriyyeti kılınmışidi. Mîr-i mûmâ ileyh Ordu-yi hümâyûn'a vârid ve ibrâz-ı hatt-ı şerîf eyledikde, fi'l-hâl mesned-i Kethudâyî'ye sâʿid olup, selefi dahi hidmeti meşkûr olmak zemîninde iktisây-ı hılʿat-i semmûr ile mesrûr ve ber-vefk-i irâde-i Şâhî Âsitâne-i saʿâdet tarafına râhî oldu.