Dukakin Sancağı Mutasarrıfı Kahraman Paşa, altı bin mîrîlü asker ile sefere me'mûr olup, ancak üç bin nefer tahrîr ve mîrînin bâkī akçasını müstelezzât-ı hevâ vü hevesine sarf vü tebzîr edüp, yollarda hetk-i aʿrâz-ı Müslimîn ve nehb-i emvâl-i mesâkîn ederek Tuna'ya kurbiyyeti haberi alındıkda, Hotin muhafazasına me'mûr ve bu cünha-i 'azîmesi mektûm-i sudûr-i evliyây-ı umûr olmuşidi. Hotin'e vardıkda muktezây-ı cibilleti olan fesâda âgāz ve askerî tâyifesini iğvâ vü tesvîl ile her bâr derîce-i fitneyi bâz edüp, Hotin Muhafızı Vezîr Hasan Paşa'nın meftûnu olan asker vâsıtasıyla in'idâmına 'illet [M2 27] ve aʿdây-ı liʼam Hotin'e geldikde, henüz rihây-ı harb idâre ve gubâr-ı ceng isâre olunmadan: “Asker bozuldu!” âvâzesiyle sebeb-i dehşet ve cümleden evvel firâra mübâşeret ve müstekıllen tefrika-i askere âlet olup, ‘adem-i tevhîş-i ru'esâ kasdıyla cezây-ı mâ-yelîkı teʼhîr ü izmâr ve Bender Serʿaskeri maʿiyyetine varmak üzere emr-i ‘âlî ısdâr olunmuşidi. ‘Adem-i imtisâl semtine râhî ve bu sebeble mebgūz-ı Pâdişâhî olup, i‘dâmına her çend teşmîr-i sâk olunduysa dahi hayvân-ı vahşî gibi şikâr-dan remân ve henûz tekmîl-i enfâs-ı hayât etmediği sebebi ile ele girmesi vâbeste-i vakt ü zemân olup, Hüseyin Paşa vakasında Vezâret'e taleb ve hâhişini telmîh ve i'mâl-i asker ve hıdemât-ı sâyirede yed-i gālibe erbâbından ziyâde mesâlih-i devlete yarayacağını tasrîh etmiş bulunduğundan, o zemân Hotin'e Kāyim-i makām ve semmûr kürk irsâlinden başka li-maslahatin merâmına müsâʿade olunacağı îhâm olunmuşidi. Bu va'd-i garîbü'l-üslûba igtirâr ve bî-bâk ü pervâ sâniyen Hân-tepesi'ne nasb-ı hıyâm olunacağı gün yemeklik yerinde dâmen-i Sadriaʿzamî'ye ruh-sâ olduğu hîn-i i‘dâmına âmâde kılınan Silahdâr ve Enderûnîler'den birkaç nefer kimseler mahbûs olduğunu ifâde ile verây-ı sâyebânda kayd ü bendiyle iştigāllerini Silahdâr'ı müşâhade ve fi'l-hâl tabancasını çeküp, Pîşkîr Ağası'nı dağdağa-i dünyadan âzâde etmekle, şahs-ı merkūm katl olunup, Paşa-yı mûmâ ileyhe dahi yer yer hançer havâle ve şöhret ü nâmı sahife-i 'âlemden izâle olundu. Mûmâ ileyhin etbâ'ı Arnabud tâyifesinden olup, muhallefâtını kabza meʼmûr olanlara: “Mebâdâ! Teslîmde izhâr-ı huşûnet u 'inâd ve yağma vü gārete itâle-i dest-i fesâd eyleyeler" deyü bu vakʿada hâzır olan Karesi Mutasarrıfı ‘Abdullah Paşa zikr olunan muhallefâtın hırâsetine me'mûr olup, maktûlün ordusuna vardıkda kabz-ı muhallefâta şahs-ı vâhid mâniʿ olmamışiken maʿiyyetinde olan levendât, muhallefâtı yağma vü tâlân ve etbâʿını ‘uryân ve baʿzısını cerh u darb ile nâ-tuvân eylediklerini o makūle felâket-zedeler gelüp, Serdar-ı Ekrem otağı pîş-gâhında dâd-hâhâne şikâyet ve bu tavr-ı garîb Sadrıaʿzam'a mûcib-i melâlet olarak, fi'l-hâl Çavuş-başı maʿrifetiyle nehb ü gasb olunan eşyânın baʿzısını istirdâd ve baʿzısını tâyife-i levendât ketm [M2 28] ve nefs-i habîslerine zuhûrât-ı îrâd kayd eylediler.