Hotin Serʿaskeri Vezîr Mehmed Paşa'nın ordusunda ihtişâd eden ecnâdın, mukābele-i aʿdâda ʿadem-i sebât ile müteferrik-i berârî vü felât oldukları, Ordu-yi hümâyûn halkına bâʿis-i fütûr u kesel ve düşmenin kasdı Yaş tarafında İbrâ’îl Kalʿası'na hücûm olduğunu askerî tâ'ifesi takavvül ile tedâbîr-i evvele îrâs-ı vehn ü halel eylediklerinden gayri Bender anbarlarında mutlakā me'kûlât kalmayup, bi-zarûre sevâhil-i Tuna'dan çâr-pâ ile isticlâb ve vaktiyle zehâyir yetişemediğinden sunûf-ı asâkir ızdırâb çeküp, bu esbâb ile yevmiyye iki bin üç bin kadar âdem Ordu-yi hümâyûn'dan ser-dâde- i vâdî-yi firâr ve iʿâdeleri nâ-güncây-ı havsala-i iktidâr olup, askere bu cihetle kıllet tarayân ve beyne'n-nâs nev-be-nev erâcîf ve ükzûbe deverân etmişidi. İbrâ'îl ve İsakçı anbarlarından nakl-i zahîre âsân ü heyyin ve Hotin'e imdâdın sühûleti mütebeyyen olmak haysiyyeti ile Hân-tepesi'ndı Ordu-yi hümâyûn'un mehâsin-i istikrârını kâr-fermâyân-ı Devlet tedbîr ve Bender'e bir ser-asker ve muhâfız taʿyîn olunmasını tezkîr eylediler. İlsâvât cânibi Serʿaskeri Vezîr Gül Ahmed Paşa-zâde ʿAli Paşa Serʿaskerliğe şâyân görülüp, ilbâs-ı hilʿat zımnında Serdâr-ı ekrem tarafından daʿvet olundukda, perîşânî-yi asâkir ve kıllet-i zehâyir ile kabûl-i hatb-ı Serʿaskerî'den rû-tâb-ı ictinâb ve Kethudâ Bey haymesine gelüp, mehâzîr-i Serʿaskerî'yi itnâb ü ishâb ile ʿadem-i kabûlünü işrâb edüp, taraf-ı Serdâr-ı ekremî'den ilbâs-1 hilʿat maslahatı taʿcîl olundukça, sebeb-i taleb ne olduğu maʿlûm olduğundan, izhâr-ı tereddüd ve suʿûbet-i hâl fikriyle bi'z-zarûre irâ'et-i rûy-i dürüştî ve taʿannüd edüp, iki sâʿat kadar kīl ü kāl ve cevâb ü su'âl-i mütemâdî ve iki tarafın mândegî ve taʿbına bâdî olup, bi'l-âhıra Ordu Kadısı ʿAbdullah Efendi ve Kapu Kethudâsı Bayburdî Mustafa Ağa Meclis'e gelüp, ebhâs-ı kesîre ile müşârun ileyhi ilzâm ve yetmiş beş bin guruş mîrîden yirmi beş bin guruş Kapu Kethudâsı'ndan ber-vech-i karz tarafına teslîm olunup, sâyir metâlibin husûlüne dahi bi'l-ittifâk [M2 26] ihtimâm edeceklerini teʿahhüd ve iltizâm eylediklerinden, sûret-i rızâ ile Otâk-ı Serdâr-ı ekremî'ye tahrîk-i pâ ve dûş-i istîhâline Serʿaskerlik hilʿati iksâ olunup, Mîr-i mîrân'dan dîger Abaza Paşa dahi Bender Kalʿası muhâfazasına taʿyîn ve onun dahi metâlibine müsâʿade ile harâreti teskîn olundukdan sonra Sadriaʿzam ve Serdâr-ı ekrem hazretleri işbu rebîʿulevvelin yirmi ikinci çehârşenbih günü Bender Sahrâsı'ndan fekk-i evtâd-ı ikāmet ve Hân-tepesi'ne doğru tahrîk-i livâ-i ʿazîmet edüp, Karahisâr Mutasarrıfı Mîr-i mîrân'dan Seyyid Mehmed Paşa çarhacılığı ihtiyâr ve Çirmen Beyi Cevher Paşa dümdâr kılındı. Serʿasker-i müşârun ileyhin maʿiyyetine tertîb-i cunûdun lüzûmu zâhir olduğundan, Karahisâr Sancağı mutasarrıfı olup, Mîr-i mîrân'dan Esîrî Bekir Paşa ve Hacı-zâde Mehmed Paşa ve Haleb Eyâleti ve Sipâh ve Silahdâr ocağlarından biner nefer terakkīlü tahrîr olunup, Yahyâ Paşa Mektupçusu Hüsnü Efendi dahi Bender Defterdârı yerine kāyim ve selefi Şehdî ʿOsmân Efendi Ordu-yi hümâyûn ile Hân-tepesi'ne ʿâzim oldu.