Bundan akdem aʿdânın berü taraflara mürûr etdiği haberi mütevâtir ve meşhûr olduğuna binâ'en, Hân ve sâ'ir me'mûrlar Hotin tarafına teveccüh ve hilâl-i tarîkde bozgun askere tesâdüf ile el-yevm düşmen Kanlı-köprü'de olduğunu tefevvüh etmeleriyle, râh-ı gürîzleri katʿ ve cümlesi cemʿ olunduğu ve bir mikdâr zahîre ve piyâde asker ile imdâd olunması Hân ve ʿAli Paşa taraflarından tahrîr olunmağla, mümkin mertebe piyâde ve zehâyir tesyârından başka ʿAli Paşa Başbûğluk ʿunvânıyla iʿzâz ve Ordu-yi hümâyûn hazînesinden guzâta lede'l-iktizâ sarf-ı tevzîʿ içün beş bin altun ve bir mikdâr çelenk ifrâzıyla bâzûy-ı [M2 25] iktidârı tesdîd ve Hân-ı ʿâlişân ile müzâkere-i umûr ve ittifâk etmek husûsâtı tarafına te'kîd ve on bin guruş dahi be-resm-i ʿatiyye Abaza Paşa tarafına irsâl ve cümleye evâmir ve kavâyim ile ifâde-i hâl olundu.