Bundan akdem İlsavât üzerine asker tertîb ve birkaç orta dahi karşuya eğerçi imrâr u tesrîb olunmuşidi. Ancak Serʿasker ordusuna zahîre îsâlinde ʿusret ve ʿale'l-husûs Hotin vakʿası dahi beyne'n-nâs vâsıl-ı ser-menzil-i şöhret olup, bâri şu kadar tedârük [M2 24] ve emek zâyiʿ olmamak içün aʿdâyı işgāl ve çete tarîkıyla bir mikdâr asker o tarafa taʿyîn ve irsâl olunsa, fâyideden hâlî olmayacağını bu defʿa münʿakid olan meclisde baʿzı ehl-i tedbîr takrîr etdiklerinde, re’y ü tedbîrlerine lâ-be's denilerek birkaç kimseye hilʿat ilbâs olunmuşidi. Asâkir beyninde olan ihtilâl ve zahîre kılletiyle hâsıl olan teşvîş- i bâl bu mâddeyi dahi ilgā ve Hotin tarafı şuglüne ilcâ eyledi. Ordu-yi hümâyûn'da bi-kazâ'illâhi Teʿâlâ vukūʿ bulan kaht ü galâ sebebi ile nev-be-nev urcûfe hâdis ve hall ü ʿakd erbâbının kemâl-i iztırâb-ı vahşetine bâʿis olup, Serdâr-ı ekrem dahi ʿadem-i müsâʿade-i rûzgâr ile münharifü'l-mizâc ve muhtâc-ı tedbîr u ʿilâc olup, herkes mütehayyir ve gāyet-i ahvâle nâzır iken, nâ-gâh Bender varoşunda câdde ile gider bir şahs-ı küştenî: “Kâfir basdı” sadâsıyla feryâd ve hâric u dâhilde bulunanların dehşetini müzdâd edüp, az kaldı deryây-ı mevvâc-ı asker latme-endâz-ı hurûş ve nehb-i ordu gibi bir emr-i mekrûh vukūʿuyla ʿâlem-i ser-mest ve medhûş ola! Hele ne hâl ise: “Mekr-i câsûsdur” deyü dellâllar nidâ ve serhad halkı dahi bu maʿnâya zehâb ile defʿ-i hareket-i erbâb-ı hevâ eylediler. Boğdan Voyvodası Ligor'un ʿazl ü istîsâli mukaddemâ işrâb ve Âsitâne'den Voyvoda vürûduna dek umûr-i Boğdan'ın iki üç Boyar'a tefvîz olunması istisvâb olunmuşidi. İskerlet Suyu'ndan Kostantîn bu defʿa Boğdan Voyvodalığı'na taʿyîn ve Ordu-yi hümâyûn'a gelüp, ilbâs-ı hilʿat olundukdan sonra, izhâr-ı mâye-i sadâkat eylemesi tenbîhâtıyla gûş-i gafleti taʿrîk ve mukaddemâ Boğdan tarafına me'mûr Çerkes Bey mübâşiriyyeti ile zimâm-ı ʿazimeti tahrîk olundu.