Vezîr-i müşârun ileyh gāyet-bîn ve sâhib-i temkîn bir Vezîr olup, tavâyif-i askerînin me'lûf-i tereffüh ü âsâyiş ve ceng husûsunda terk-i idmân ü âzmâyiş eyledikleri sebebi ile rûz-i mesâffda pây-dâr ve uğûr-i Pâdişâhî'de cân-sipâr olmayacağlarını istişʿâr eylediğinden gayri, kıllet-i zehâyir bâdî-yi perîşânî-yi asâkir olacağını yâd ve dâmen-i istifa'ya teşebbüs ile refʿ-i ʿakīre-i feryâd edüp, bilâhıre Kethudâ Bey ve Defterdâr Efendi kâffe-i umûr-i Serʿaskerî'yi iltizâm ile her irâdesinin husûlü zımnında berçîde-i dâmen-i ihtimâm olacağları mukaddemâtını temhîd ve hatb-ı cesîm-i Serʿaskerî'yi gerden-i himmetine taklîd eylediler. Kırım Hânı dahi kırk bin kadar Tatar düşmen-i şikâr ile İlsâvât tarafına mürûr ve tahrîb ü ihrâk ve seby ü istirkāk maslahatıyla diyâr-ı küffârı berhem-zede-i heyyâc u şûr etmek üzere me'mûr oldu.