İşbu şehr-i rebîʿulevvel evâsıtında Hân-ı ʿâlîşân ve vüzerây-ı ʿizâm ve sâyir erkân-ı devlet, otâk-ı Süreyyâ-nitâkda ʿakd-i encümen-i cemʿiyyet ve tarh-ı kurʿa-i meşveret eyleyüp, aʿdây-ı bed-sigālin Ak-su tarafından Memâlik-i Devlet-i ʿaliyye'ye hücûmu karâyin-i hâliye ile istidlâl ve Boğdan boyarlarının baʿzısı Moskovlu ile müttahid ve baʿzısı firâra müstaʿid olmağla, Yaş Kasabası'nı muhâfazaya kaviyyü'l-iktidâr bir Vezîr-i nâmdârın taʿyîn olunması münâsib-i hâl ʿadd olunup, bu sûretde Moskovlu'nun Ak-su boynunda müceddeden inşâ eylediği İlsâvât ve Orhangrad ve Mîrhorâd kalʿalarının feth u teshîri ve kasd-1 mukābele ile ser-nümâ olan Moskovlu'nun kahr u tedmîri zımnında: “Müretteb ordu ile bir Serʿasker nasb u tesyîri münâsib midir?" deyü Serdâr-ı ekrem cümleye hitâb ile cûyende-i cevâb-i bâ-savâb oldukda, Moskovlu'nun zikr olunan kılaʿda askeri mevcûd iken, âhar mahalle taʿyîn-i cünûd sû-i tedbîrden maʿdûd olup, hemân kılâʿ-ı mezkûrenin istihlâsı içün kifâyet mikdârı asker ve mühimmât ile bir Vezîr-i sütûde-tedbîrin Serʿasker nasbı ve Boğdan memleketi ile Yaş Kasabası'nı muhâfazaya âhar bir Vezîr'in taʿyîni enseb ve mecârî-yi ahvâle nazaran müstasvab olup, bu maslahat hitâmında verây-ı estâr-ı Takdîr'den ne sûret rû-nümây-ı zuhûr olursa, [M2 19] iktizâsına göre hareket olunur” deyü meclisde olan erbâb-ı elbâb, sedd-i ebvâb-ı sû’al ü cevâb eylediler. Binâ'en ʿalâ zâlik Bender Serʿaskeri olan Moldovâncı Vezîr ʿAli Paşa Serʿasker'likden ʿazl olunup, Yaş Muhâfazası'na taʿyîn ve Ak-su boynunda vâkiʿ kılâʿ-ı mezkûrenin teshîriyçün tertîb olununan askere Vezîr Gürcü Ahmed Paşa-zâde ʿAli Paşa Serʿasker nasb olunup, dûş-i istîhâli semmûr-i fâyizi's-surûr ile tezyîn olundu.