Bu esnâda aʿdâ tarafından deliller ahz ve istintâk olundukda, Rusya askeri sergerdesi olan Galçin nâm Ceneralin mukaddemâ Hotin tarafına irsâl etdiği Dolgoroki nâm Başbûğ ile Abaza Paşa ve sâyir behâdıran-ı İslâm münâvele-i âlât-ı hısâm eylediklerinde, zikr olunan Başbûğ ve iki nefer Cenerâl ve üç nefer Mayor ile altı nefer ofiçyâl ve vâfir piyâde ve süvârî, müsellem-i eyâdî-yi zebâniyân ve pesmânde-gân-ı küffâr Hotin'e yirmi sâʿat mesâfe olan Bâr Kalası'nda ittihâz-ı mekân ve Kamaniçe Kalası'na mesâmet olan karyelerde dört bin kadar Kazak etrâfdan henüz idrâk etmiş zahîreyi döğdürüp, Bâr Kalası'nda olan küffâra îsâl ü infâk ve Kiyeve tarafından bu esnâda bir mikdâr asker gelüp, cemʿiyyet-i ûlâ'ya iltisâk ve Rusya hılâf-gîrlerinden olup, baʿzı becenelere mutahassın olan Leh reʿayâsını Kazâklar nehb ü gāret ve karîben Hotin üzerine geleceklerini îmâ vü işâret eylediklerini baʿzı cevâsîs tahkīk ve bu hılâlde Leh tarafından firâr eden Yehûdîler dahi [M2 20] ahbâr-ı mezkûreyi tasdîk eylediler. Mîr-i mîrân-ı kirâmdan Karesi Sancağı mutasarrıfı olan Uzun ʿAbdullah Paşa çetecilik ünvânıyla Nehr-i Turla'yı karşu geçüp, kerhen ev tavʿan Rusyalu'nun yed-i tehakkümuna giriftâr olan Lehlü'nün baʿzısı Derbika (دربقه) ve Loje (لوژه) nâm mahallere mücâvir becenelere tehassun edüp, o taraf Bâşbuğu olan Ceneral tarafından muhafazalarına dokuz bin kadar eşkı-yây-ı Kazak ilhâk olunduğu haberini Paşa-yı mûmâ ileyh istirâk etmekle, mütevekkilen ʿala'llah üzerlerine hücûm ve dokuz yüz kadar kâfiri seyf-i sakīl-i salâbet ile maʿdûm eylediğinden gayri, vâfirini kayd-ı esre rabt ile mahallerini âşiyâne-i gurâb ü bûm eyleyüp, elviye-i bâz-gûne ve ru'ûs-i maktûʿa ile Ordu-yi hümâyûn'a ricʿat ve kürk ve çelenk ve sâyir inʿâmât ile kāyid-i leşker ve serân-ı asker kesb-i mefharet eylediler.