Kırım Hânı'nın ahvâl-i aʿdâya oldukça vukūfu olup, düşmen kankı tarafdan zuhûr eyleceği tahkīk olunmak hâtırası, kalb-i Serdâr-ı ekremî'ye lâyih ve ârâm-gâhı olan Kavşan Karyesi'nden [M2 18] Ordu-yi hümâyûn'a gelmesi bâbında daʿveti mutazammın tarafına âdem râyih olmuşidi. Hân-ı müşârun ileyh yerinden hareket ve Ordu-yi hümâyûn'a bir sâʿat mahalde tertîb olunan yemeklik resmi icrâsından sonra alay ile Ordu-yi hümâyûn'a gelüp, Serdâr-ı ekrem hazretleri birkaç hatve istikbâl ile lâzime-i mihmân-nüvâzîye riʿâyet eyleyüp, sefere dâ'yir baʿzı umûr müzâkeresinden sonra taraf-ı Hânî'lerine iʿdâd olunan hıyâma atf-ı ʿinân eylediler. Yeniçeri Ağası'nın hall ü ʿakde iktidârı olmayup, kıllet-i taʿyînât sebebi ile zâbitleri kelâm-ı maʿkūl ile ilzâm, farîza-i zimmeti iken, rûy-i dürüştî ve huşûnetle herkese cevâb-dâde ve askeri ʿadem-i zabt ile birer tarafa üftâde eylediği gayzı, hâtır-ı erkân-ı Saltanat'da muzmerr ve Kırım Hânı dahi Serdâr-ı ekrem ile hîn-i mülākātda bu kazıyyeyi mü’ekked ü mukarrar edüp, fi'l-hâl Ağalık'dan ʿazl ü tekdîr ve Dimetoka'ya nakl ü tesyîr ve Bender Ordusu Ağası olan Kul Kethudâsı sâbık Süleymân Ağa Yeniçeri Ağalığı ile mazhar-ı lutf-i vefîr kılındı.