İsakçı menzilinde münʿakid olan meşveret-i ʿumûmiyyede Serdâr-ı ekrem hazretlerinin ne cânibe teveccüh edeceği katʿ olunmayup, Tuna'yı murûrdan sonra maslahat-ı vakte nazaran hareket olunması karar-gîr-i erbâb-ı reʾy ü tedbîr olmuşidi. Ber-minvâl-i muharrer Tuna'yı geçüp, tayy-ı menâzil ile Hân-tepesi nâm sahrâ, muhayyem-i asker-i zafer-eser olup, Hotin tarafına gereği gibi takviye ve istihkâm ve ʿale'l-husûs asker-i kesîr ile Leh cânibi Serʿaskeri'nin nasbı maslahatına hıtâm verilüp, Ordu-yi hümâyûn'un Bender tarafına teveccühü istisvâb ve saferin yirmi dördüncü günü Bender'e karîb Yassı-tepe dimekle şöhret-yâb olan fezây-ı vâsiʿ, ârâm-gâh-ı cünd ü sipâh oldu.