Kırım Girây Hân-zâde Kaplan Girây Sultân, zehâyir-i mîrî anbarları hirâsetine Kırım Hân'ı Kaplan Girây Hân tarafından meʾmûr ve muktezây-ı meʾmûriyyeti üzere emr-i muhâfazada saʿyi meşkûr olup, bu mukābelede ferve-i kākum ilbâsıyla mesrûr oldu. İç-il Sancağı ilhâkıyla Bender Muhâfızı Mîr-i mîrân-ı kirâmdan Sarı-zâde Mehmed Paşa fî'l-asl Sivas Alay-beyisi olup, tuğyân-ı levendât zemânında Sivas Mütesellimi bulunmağla, ser-âmed-i evbâş olan Kadı-oğlu maʿrekesinde izhâr-ı şecâʿat ve merdânegî etdiğinden, Mîr-i mîrânlık ile Çorum Sancağı, ʿunvân-ı ser-nâme-i ikbâli olmuşidi. Trabzon ve Van ve Kars eyâletlerinde dâyir ve Gürcü Mehmed Paşa vakʿasından sonra Kars nizâmına taʿyîn kılınup, zorbaları tedmîr ve serhadd-i Pâdişâhî'yi tathîr eylediğine mukābele [M2 15] ve maskat-ı re'si olan Sivas Eyâleti'yle hakkında muʿâmele bi'l-mücâmele kılınmışdı. Sefer-i hümâyûn takrîbi ile Sivas Güllü Ahmed Paşa-zâde Vezîr el-Hâc ʿAlî Paşa'ya tevcîh ve mûmâ ileyh ʿan-asıl sefer görmüş ve âzmâyiş-i umûr etmiş kimselerden olduğuna binâ'en, İç-il Sancağı'yla kadri tenvîh olunup, baʿdehû Bender Muhâfazası'na ʿinân-ı meʾmûriyyeti tahvîl ve bir müddet umûr-i muhâfazaya kıyâm ve takviye-i etrâf u enhâya ihtimâm üzere iken, enfâs-ı hayâtını tekmîl eyledi. Paşa-yı mûmâ ileyh cesûr ve behâdır ve iʿmâl-i askere kādir ve umûr-i siyâsiyyede mâhir, latîfe-gûy, maʿârif-âşinâ ve tehdîdini îkāʿa kādir bir merd-i tüvânâ idi. Sugūr-ı İslâmiyye'de mutarassıd-ı ruhsat-ı ceng ü peykâr olan vülât, ve serân-ı askere a'dânın bulundukları mahallerde kahr u tedmîrleri husûsu mukaddemâ ahkâm-ı Sultânî ile tenbîh ü işʿâr olunduğuna binâ'en, bu hılâlde Nureddîn Sultân, Aksu'yu bir mikdâr Tatar ile güzâr edüp, bin kadar Kazak'a tesadüf edüp, tarafeyn birbirine ʿale'l-gafle hücûm u hamle etmekle, Kazaklar firâr ve bir mahalde tehassun etdikleri aşikâr oldukda, etrâfları istîʿâb ve ekserîsi küşte-i şemşîr-i âteş-tâb kılınup, ecel-i nâresîdeleriyle bir nefer fuçyal, üftâde-i kemend-i ibtâl olup, Ordu-yi hümâyûn'a gönderildiği Hân tarafından tahrîr ve zikr olunan üserâ telhîs ile Âsitâne tarafına tesyîr olundu. Muhzır Ağa Yazıcısı ʿAbdusselâm Efendi, ahz-ı takrîr-i üserâ ve iblâğ-ı havâdis-i küberâ zımnında, Serdâr-ı ekrem'e olan intisâbını ocağlusu hazm edemeyüp, kurb-i Bâb-ı ʿâlî'den dûr ve şeref-i musâhabet-i Sadru's-sudûr'dan mehcûr olmak dâʿiyesiyle, sûret-i ikrâmda Baş-yazıcı nasb olunup, birkaç gün mürûrunda bir Ağalık ile tagrîb ve yerine Zindan Kâtibi ʿÖmer Efendi tatrîb olundu. Diyârbekir muzâfâtından Palu Bey'i İsmâʿîl Bey yarar asker ile Ordu-yi hümâyûn'a gelüp, alayını ruʾyet ve bu mukābelede müstehakk-ı tahsîn ve pâ-der-rikâb-ı ʿazîmet olan Leh cânibi Serʿaskeri maʿiyyetine taʿyîn olundu. Ordu-yi hümâyûn Kadısı olup, lisân-ı ʿavâmda Altunuçok dimekle şehîr olan ʿAbdullah Efendi ehl-i ʿilm ü fazîlet ve sahib-i hûş u dirâyet olup, seferber olan emsâline riʿâyet olunduğu gibi, Efendi-yi mûmâ ileyh dahi melhûz-i nigâh-ı [M2 16] ʿâtıfet olmak, muktezây-ı şîme-i Devlet-i ebed-müddet olmağla, saferu'l-hayrın evâhirinde lutf-i hazret-i Cihân-bânî olan Anadolu Pâyesi fermânı Ordu-yi hümâyûn'a vârid ve taraf-ı Serdâr-ı ekremî'den yedine iʿtâ ile mahsûd-i erbâb-ı mesânid oldu.