Sivas Vâlîsi Gül Ahmed Paşa-zâde Vezîr ʿAli Paşa, kemâl-i übbehet ü dârât ve küllî asker ve neferât ile mevkib-i hümâyûna vâsıl ve gösterdiği alay-ı dilârâdan tabʿ-ı Serdar-ı ekremî'ye inşirâh hâsıl olup, müşârun ileyhi semmûr kürk ilbâsıyla cezlân ve Ordu-yi hümâyûn'da ikāmetini fermân eyledi. Halebî Receb Paşa ve Mûsulî ʿAbdulcelîl-zâde Emîn Paşa, ve Maldovancı ʿAli Paşa'nın tavr u hareketlerinden Serdâr-ı ekrem hazretleri müşme'izz ü müteneffir ve ʿAli Paşa sâhib-i haseb ve Âsitâne-i saʿâdet'de tahsîl-i edeb etmiş vüzerâdan olduğuna binâʾen, mülâkātda “vazʿ u reftârından müteşekkir olup: "Birâder-i cenâbınızı reʾye'l-ʿayn müşâhade ile sohbbetinize gûş-dâde olmasa idim, vüzerây-ı ʿizâma inkırâz geldiğine cezm ederdim” dediğini Fakîr-i kasîru'l-bâl müşârun ileyhden şifâhen istimâʿ eyledim. Sâbıkā İbrâ'îl Muhâfızı Canikli Süleymân Paşa dahi Ordu-yi hümâyûn'a celb olunduğuna binâʾen Özi muhâfazası ʿuhdesi- ne tefvîz ve bir ân akdem ʿazîmetle emr-i muhâfazaya kıyâm eylemesi igrâ vü tahrîz olundu.