Hotin Serʿaskeri nasb olunan Rumeli Vâlîsi Vezîr Mehmed Paşa, mukaddemâ maʿiyyetine me'mûr olan tavâyif-i askeri ile bi'n-nefs karşu tarafa mürûr irâdesinde olup, Moskovlu ile zünnâr-bend-i ittifâk olan Lehlü'yü seby ü istirkāk ve Moskovlu'yu dahi hîn-i musâdefede zor-ı bâzû ile dûzahîlere ilhâk etmek bâbında tâlib-i izn ü ruhsat ve husûs-ı mezkûr bâdî-yi nazarda menâfiʿ-ı harbiyyeden maʿdûd ise dahi cüz’î tedâruk ile müşârun ileyhin hareketi, şerîta-ı hazm ü ihtiyâta ʿadem-i riʿâyet kabîlinden olup, binâ-berîn müşârun ileyh Ordu-yı hümâyûn'a gelüp, istîzân etdigi maslahatın zîr u bâlâsı mutâla'a ve müşâvere ve dûş-i gayretine mahmûl olan hatb-ı cesîm Seraskerî'nin tekmîl-i şevârid-ı umûru ʿakabinde icrây-ı muktezayât-ı hâle mübâdere olunmak üzere tarafına hükm-i şerîf itâre olundu. Leh boyarlarının müteşahhıslarından olup, Moskovlu'ya muhâlefet ile terk-i ceyl ü memleket eden Potoski bir zemân Kırım Girây Hân dâ'iresinde ikāmet-güzîn ve bir müddet Bender'de kûşe-nişîn olup, Ordu-yı hümâyûn'un Hân-tepesi'ne vürûdunu istimâʿ ile Bender'den derre-zen-ı hareket ve Mevkib-i hümâyûn'a geldiği, gûş-zed-ı Sadr-ı vâlâ-menkabet olmağla, saferu'l-hayrın on birinci penç-şenbih günü otâk-ı Süreyyâ-nitâk-ı Serdar-ı ekremi tezyîn ve mesfûra mahal taʿyîn [M2 11] olundukda, cevaba âgāz ve: "Moskovlu'dan şükûh-perdâz olup, beyne'd-düvel serbestlik ile imtiyâz bulan Leh memâlikini Moskovlu pâ-zede-i mazâr ve dâʿiye-i istimlâk ile mecmaʿ-ı leşker-i cerrâr edüp, bu vazʿ-ı nâ-hencâr Devlet-i ʿaliyye ile olan ʿuhûdun mugāyiri olmak iʿtibârıyla Moskovlu'ya haddini bildirmek ve Lehlü'nün imtiyâzât-ı kadîmelerini iʿâde eylemek içün cenâb-ı Niʿamü'l-meâblarının 'unvân-ı Sipehsâlârî ile mükerrem oldukları, Leh cumhûruna bâʿis-i memnuniyet ü iftihâr olmuşdur” dedikde, Sadri-aʿzam ve Serdâr-ı ekrem hazretleri bu vechile bast-ı güftâr-ı garâyib-nigâr buyurdular ki, Moskovlu'nun hılâf-ı şurût Leh memleketine itâle-i dest-i teʿaddîsi, mukaddemâ Leh cumhûru tarafın- dan Devlet-i ʿaliyye'ye tahrîr olunduğuna binâʾen, serbestlik lâzimesi vikāye olunarak Lehlü'nün istihsâl-i esbâb-ı rahatı ve beyne'd-devleteyn cârî olan ʿuhûd u şurûtun ʿadem-i mugāyereti, cumhûra mü'ekkeden tahrîr ve vukūʿu muhtemel olan baʿzı mekârihden menʿ u tahzîr olunmuşlar iken, ʿadem-i isgā ve kemâl-i gaflet ve gurur ile düşmenin ʿinân-ı ʿazîmetini irhâ eylediler. Ancak, Devlet-i ʿaliyye Lehlü'nün himâyesinden dest-keş-i ferâğ olmayup, ihâta-i ʿâlem eder asâkir ile meʾmûriyyetimiz hasebiyle sayf u şitâ, subh u mesâ demeyüp, ne mahalde aʿdâyı bulursak şemşîr-i zafer-teʾsîr ile kahr u tedmîrlerinde taksîr olunmaz. Ben ki Pâdişâh-ı ʿalem-penâh hazretlerinin necli makāmında dâmâd ve Serdâr-ı ekremi'yim, seyrim seyr-i İskender ve hareketim berk-i lâmiʿu'l-eserden bâlâ-ter olup, Devlet-i ʿaliyye'ye iddiâ ettiğiniz safvet, şâ'ibe-i küdûretden vâreste ise, hasmın gayr-i metbûʿu olan Lehlüler'i ifrâz etmek hususunu tarafından cumhûra işâet ve sen dahi başında olan Lehlüler ile hâzır u müheyyâ olup, o tarafa Serʿasker nasb olunan Vezîr Mehmed Paşa ile bi'l-maʿiyye Turla'yı güzâra sürʿat edüp, vüsʿ u tâkatiniz yetişdiği kadar îfây-ı lâzime-i dostî ve tarafdârîye dikkat eyleyesiz” dimekle meclise gāyet ve kelâma nihâyet verildi.