Sadrıaʿzam ve Serdâr-ı Ekrem Babadağ'ından tahrîk-i kadem ve İsakçı Sahrâsı'na rekz-i ʿalem edüp, mühimmât ve levâzım-ı seferiyyeyi tekmîl ü itmâm zımnında yirmi gün kadar ârâm ve münâsib olan mahalle hirâm etmek irâdesiyle Ordu-yi hümâyûn ricâli ve Ocağlu ve sâyir erbâb-ı vukūf ile ʿakd-i encümen-i meşveret ve ne mahalle ʿazîmet münâsib olduğunu keşf ü îzâha mübâderet edüp, hattâ bu su’âl ʿakabinde: “Benim sefer ile ülfetim olmayup, ne tarafa hareket Devlet-i ʿaliyye'ye hayırlu ise o mahalli taʿyîn ve cihet-i nâfiʿayı bilâ-ketm ü tereddüd tebyîn edin” dedikde aʿdâ-yı dînin çigûnegi-yi ahvâli verây-ı perde-i hafâda mütevârî ve bu sebeble huzzâra vâleh ü [M2 10] hayret-târî olup, herkes mühür-zen-i leb-i sükût ve birbirine nazar ile mebhût oldular. Baş-muhâsebeci Şehdî ʿOsmân Efendi tahrîk-i zebân ve aʿdâ bundan akdem Hotin tarafından nümâyân olup, bu defʿa Bender tarafından zuhûru ihtimâle karîb olduğunu beyân ile kelâmı tatvîl ve Serdâr-ı ekrem hazretleri: “Yetüşür sâyirleri dahi söylesün” kelâmıyla mûmâ ileyhi tahcîl eyleyüp, Ocak ihtiyârlarından baʿzıları Özi ve Bender kal'alarının hasânet ü metânetinden bahs ile Hotin tarafına hareketi tercîh ve baʿzıları Nehr-i Tuna mürûrundan sonra iktizây-ı hâle göre hareket olunmasını tasrîh etmeleriyle, re'y-i ahîr pesen-dîde-i Sadr-ı müşterî-tedbîr olup, muharremu'l-harâmın yirmi altıncı günü sunûf-ı asâkir, kānûnları üzere Tuna üzerine memdûd olan cisrden Kartal cânibine güzâr ve yerlü yerlerinde nasb-ı hıyâm ve ittihâz-ı makām ile karâr eylediler.