Moskovlu ile mutâraha-i kâr-zâr mütehakkak u âşikâr olup, henûz tecavüz-i hudûda ikdâm ve cesâretleri müşâhade olunmamış iken, muhafız paşanın fikdânı sebebi ile askerî beyninde fesâd ve bu sebeble istihlâs-ı kalʿada istiʿdâd vehmiyle Turla'dan bir mikdar asker imrâr eyledikleri, Hotin'de olan dilâverân-ı İslâm'a be-dîdâr oldukda, varoşda bulunanlar üç gün muharebeden sonra bir fırkası kalʿaya mütehassın ve bir fırkası Boğdan tarafına teveccüh eylediği, kalʿada olanlara mütebeyyin oldukda, aʿdâ temekkün ü teterrüs etmemek kasdıyla maʿmûriyyeti şühre-i âfâk olan varoşu ihrâk ve kal'adan ceng ü peygâre teşmîr-i sâk eylediler. Kalʿada olanların sebât ile mukāvemetleri aʿdânın hesabına uymayup, geldikleri semte hâyiben ʿavdet hilâlinde, Hotin me'mûrlarından Teke Mutasarrıfı Abaza Mehmed Paşa yetüşüp, düşmen ile âheng-i ceng ve beş sâʿat kadar iʿmâl-i top ve tüfeng eyleyüp, Paşa-yı mûmâ ileyhin emvâl ü eşyâsı gāret ve maʿiyyetinde olan askerin ekeserîsi nâyil-i şehâdet olduysa dahi, vâfir küffârı rumh-i hatar ve tîğ-i âteşbâr ile îsâl-i dereke-i nâr eylediği ihbârı Babadağ'ı Sahrâsı'nda muʿasker-i hümâyûna vâsıl olup, top şenliği ile izhâr-ı beşâşet ü mesârr kılındı.