Serdâr-ı Ekrem hazretleri sâl-i sâlif zilhiccesinde Edirne Sahrâsı'nı madrib-i hıyâm ve Edirne Bostancı-başısı olan İsmâʿîl Ağa'yı, Kapucu-başılık ile be-kâm edüp, mütevaffâ Kırım Girây Hân'ın Dîvân Kâtibi olan Besîm Ömer Efendi'nin huşûnet-i tahrîrât ile baʿzı umûra mübâşereti, sebeb-i idbâr ü nekbeti olup, Bihke Kalʿası'na nefy ü tesrîb ve o mîzâcda olan kimseler bu takrîb terhîb olundu. Sûret-i etıbbâda birkaç nefer kâfir hasebîce tîmâr-ı merzâ dâʿiyesiyle mevkib-i hümâyûnda sâyir oldukları mütevâtir olup, lede'l-istintâk Moskovlu tarafından eczây-ı semûmiyye ile taʿyîn olunduklarını takrîr ve vasıta-i tîğ-i hûnbâr ile ʿazm-i dereke-i saʿîr eylediler. Sipehsâlâr-ı vâlâ-câh leyl ü nehâr teksîr-i cünd ü sipâh ve şimdiye dek on bin nefer yeniçerileri tashîh be-dergâh edüp, sâyir piyâde ocağları dahi, tashîhe ruhsat-hâh olduklarından, bin üç yüz nefer Cebehâne'den ve ol mikdâr Tophâne'den ve sekiz yüz nefer ʿarabacılardan tashîh ve anlar dahi bu imtiyâzât ile tefrîh olundu.