Ordu-yi hümâyûn'un asker-i vâfir ile Âsitâne'den hareketi serhadlerde müştehir olduğuna binâ'en, Hotin yamakları Rizvanice (رزوانجه) [Zvonice] tarafına güzâr etmek zımnında muhâfızı Vezîr Hasan Paşa'dan izin ü ruhsata hâst-kâr olduklarında müşârun ileyh kalʿa muhâfazasına meʾmûr ve tecâvüz-i hudûd zımnında tarafına emr-i ʿâlî zuhûr etmediğinden, menʿe mecbûr olup, ne hâl ise iskât ve birkaç gün mürûrunda fitnekârân-ı serhad, kemâ fi'l-evvel cemʿ-i haşerât edüp, tahsîl-i ruhsat içün hadd ü edebden [M2 7] bîrûn nâ-maʿkūl harekât izhâr eylediklerinde düşmenin Turla'ya otuz sâʿat buʿdu olup, serhadlere tecâvüzü vukūʿ bulmadan askere izn ü insırâf, müşârun ileyhe bâʿis-i ictinâb ü istinkâf olduğundan gayri, Lehlü himâyesiyle Devlet-i ʿaliyye bu tekellüf-i ʿazîmi ihtiyâr edüp, Hotin halkının ise murâdları iʿlâʾ-i kelime-i Mevlâ olmayup, Lehlü'yü nehb ü seby olmağla, bu iki mahzûru mülâhaza ve Ordu-yi hümâyûn'dan haber gelinceye dek serhadd-i Pâdişâhî muhâfaza olunmak hususunda îrâd ettiği cevâb-ı maʿkūl, o makūle ʿâkibet-i umûrdan gâfil olanların sâmiʿa-i idrâklerine mevsûl olmayup, hemân bağteten Vezîr-i müşârun ileyhin üzerine hücûm ve askerinin ekserîsi hâric-i kalʿada bulunup, intihâz-ı fursatla o Vezîr-i müşterî-tedbîri dâire-i hestîden maʿdûm eylediler. Bu haber-i hâyil Ordu-yi hümâyûn'a vâsıl oldukda, mukaddemâ Boğdan tarafına taʿyîn ve şecâʿat ü dirâyeti maʿlûm-i erbâb-ı yakīn olan Selânik Mutasarrıfı Vezîr Ahıshalı Hasan Paşa, Hotin Muhâfızı nasb olunup, bir ân akdem meʿmûr olduğu emr-i muhâfazaya isti‘câl eylemesi bâbında tarafına hitâben ısdâr-ı misâl-i lâzimü'l-imtisâl kılındı. Mütevaffâ-yı müşârun ileyh Çeteci ‘Abdullah Paşa'nın yeğeni olup, Rikâb-ı müstetâb-ı hazret-i Şehriyârî'de teʿayyün ve şeref-i iktisâb eyleyerek nâyil-i Vezâret ve mükemmel kapu halkı ile sefer müzâkeresi hılâlinde ibtidâ Bender, ba‘dehû Hotin cânibine şukka-perdâz-ı livây-ı ‘azîmet olmuşidi. Müsinn ü ihtiyâr ve salâh-ı hâl ve evrâd ü ezkâr iştigâli ile şöhret-şi‘âr bir Vezîr-i nâmdâr idi.