[M2 2] BİSMİLLÂHİRRAHMANİRRAHÎM Hamd-i bî-hadd ü ihsâ, Hâlik-i arz u semâ olan cenâb-ı zi'l-celâli ve'l-kibriyâya sezâdır ki, ashâb-ı erâyik ü tîcân ve tasarruf-i kunendegân-ı ekālîm ü büldâna kemâl-i hikmet-i 'ilm ü ʿameli ile tâb ü kudret-ihsân ve şevket-i siyâset-i fâzılalarıyla nazm-ı umûr-i efrâd-ı insân eyleyüp, “Hüccetü'l-hakk ʿale'l-halk" olan mülûk-i bihterîn sülûk-i İslâmiyye'yi temessük-i hablü'l-metîn-i şerîʿat ile mümtâz ve vücûd-i ʿâlem-sûdların hilʿat-i zerrîn-tırâz-ı übbehet ve teşrîf-i latîf-i sâʿâdet ile iʿzâz eyleyüp, takviyyet-i kānûn-i nâmûs-i aʿzam ve takvîm-i iʿvicâc-ı mesâlih-i ümem zımnında, sahîfe-pîrây-ı hudûs olan siyer-i mergūbe ve efâʿîl-i mevhûbelerin ahlâf-ı bâhiru'l-insâfa mahall-i ʿiber ve bâlâ-nişîn-i taht-gâh-ı Saltanat olan havâkīn-i ʿadl âyîne zerîʿa-i taʿlîm-i nefʿ ü darr eyledi. Ve salât ü selâm sebeb-i âferîniş-i enâm ve mefhar-i enbiyây-ı ʿizâm olan peygamberimiz Muhammedü'l-Mustafâ ʿaleyhi efdalü't-tehâyâ hazretlerinin nisâr-ı türbe-i melâyik-makāmları kılınur ki, teʾyîd-i dîn-i mübîn ve refʿ-i zalâm-i müşrikîn zımnında, tîg-i âteş-bâr-ı şerîʿatı âhte ve ʿalem-i zer-i mencûk-i ferr u şevket-i İslâmiyye'yi efrâhte eyledi. Âl ü ashâbına da subh u mesâ, ola rıdvân-ı cenâb-ı Mevlâ. Emmâ baʿdü: Maʿlûm ola ki, fevâyid-i fenn-i târîh u siyer cild-i evvelde mufassalan güzâriş-pezîr-i kilk-i çâker-i kemter olup, bu emr-i zâhiru'n-nefʿin mebâdî vü makāsıd ve masâdır ü mevâridine aʿzam-ı Selâtîn-i cihân, Eflâtûn-i ʿasr ve İskender-i zemân, mazhar-ı sırru's-Sultân-ı Zillu'llâhı ye'vî ileyhi küllü [M2 3] mazlûmin, el-Muzdaribu min-be'sin seyfühü şidâdü'l-ʿacem ve gılâzu'r-Rûm aʿnî bihi es-Sultân el-Gāzî Selîm Hân bin es-Sultân el-Gāzî Mustafâ Hân hazretlerinin ʿilm-i ʿâlem-ârây-ı Şâhâneleri şâmil olup, zemân-ı saʿd-iktirân-ı saltanatlarında ve eslâf-ı güzînleri ʿasrında teʿâkub-i melevân ve tetâbuʿ-i hadesân ile levha-tırâz-ı sünûh olan ahvâlin tedvîni ahlâf u aʿkāb-ı şâhânelerine ber-güzâr olmak irâde-i seniyyesi, her bâr hâtır-güzâr-ı Hüsrevâne'leri olduğuna binâ'en, bundan akdem Hâkim ve sâyir vekāyiʿ-nüvislerin tahrîr etdikleri vekāyiʿin cemʿ u telfîk ve müceddeden kaleme alınarak zabt u tensîk olunması, Devlet-i ʿaliyye'lerinde el-yevm Tevkīʿî ve Vekāyiʿ-nüvîs olan ʿAbd-i kalîlü'l-bizâʿaya emr ü fermân ve zikr olunan mücelledât, şâyeste-i istihsân olacak vechile ber-vech-i muharrer kaleme alınup, merfûʿ-i ʿatebe-i refîʿu'l-bünyânları kılınup, bu mukābelede ʿAbd-i nâ-tuvân mazhar-ı cûd ü ihsân-ı Hüsrevâne'leri olmuşidim. Cild-i mezkûre zeyl olan Enverî Efendi'nin zabt eylediği vekāyiʿ, suver-i mekâtîb ve sâyir eʿâcib ile meleʾân ve her hâle ʿadem-i vukūfundan nâşî, târîh-i mecmâʿ sehv ü noksân olduğundan gayri, târîhe kaydı sezâ olmayan baʿzı ahvâli tahrîr u imlâ ile teksîr-i sevâd-ı eczâ eylediği mehbit-i feyz-i cenâb-ı Mevlâ olan tabʿ-ı mücellâ-yı hazret-i Şeh- riyârî'ye hüveydâ olmağla, târîh-i mezkûr dahi Hâkim ve sâyirlerinin âsârı gibi müceddeden kaleme alınup, mâddeleri tashîh ve hefveleri tenkīh olunmak irâde-i sâmiyesi, bu 'Abd-i kem-bizâʿaya telmîh olunup, târîh-i mezkûrun mebde'inden bir sene sonra fakīr-i pür-taksîr Mektûbî ve Âmedî kalemlerinde zuʿm-i nâsa göre, fenn-i inşâda vücûd-i meleke ve liyâkatla kesb-i iştihâr etmiş hulefâdan bulunup, serâyir-i devlete mahrem ve nâme-reslik ve mükâleme hidmetlerinde müstahdem olduğumdan başka, Rikâb-ı hümâyûna sırran takdîm olunun takārîrin ekserîsi reʼsen kalem-i ʿâcizânemle müzeyyen ve münemnem olup, bu cihetle mücelled-i mezkûrun hâvî olduğu vekāyiʿin dekāyik ve butûn-i ahvâline vukūf-i 'abîdânem ber-vech-i evfâ vü etemm olup, her mâddeyi fazl-ı Hak ile vukūʿu üzere safha-zîb-i tahrîr ve her fikrayı vech-i lâyıkı üzere pîrâye-bahş-i hüsn-i tabîr etmek ve terâcim-i aʿyân ve tekmîl-i noksân ve mübhemât-ı umûru îzâha vü beyân eylemek vâdîleri [M2 4] iltizâm ve seksen üç târîhinden bed' ile îfây-ı me'mûriyyete teşmîr-i sâk-ı akdâm kılınup, cenâb-ı Hak itmâmını mukadder ve bu matlab-ı 'azîzu'l-menâli müyesser eyler ise, evâhır-i devr-i hazret-i Mahmûd Hânî'den ilâ yevminâ hâzâ zuhûr eden vekāyiʿ-i Devlet-i ebed-müddet serâpâ eser-i kalem-i ʿAbd-i bî-kıymet olacağı zâhir olup, hemân cenâb-ı Âferînende-i besâyit ü mürekkebât ve nizâm-ı dihende-i şevârid-i ahvâl-i mahlûkāt-ı Teʿâlâ zâtühü 'ani'ş-şubuhât, kutb-i zemân ve gavs-i devrân ve bâʿis-i nizâm-ı cihân ü cihâniyân olan Şehriyâr-ı kîtî-sitân ve Pâdişâh-ı sâmî-mekân hazretlerini serîr-i şevket-masîr-i mülükânelerinde ʿömr-i tavîl ve fi'l-i cemîl ile mü'eyyed ve bu makūle âsâr-ı hayriyyenin bürûzuna mazhariyyetle ism-i sâmî ve nâm-ı kirâmîlerin sahîfe-i ʿâlemde muhalled eyliye, âmîn.