Bâlâda zikr ü beyân olunduğu vech üzere, on yedi senelik vekāyiʿ-i Devlet-i ebed-müddet, emr ü fermân sâhib-i serîr ü Saltanat ve irâde-i Şehinşâh-ı İskender-sîret ile bâ-hüsn-i taʿbîr ve sebk-i dil-pezîr-i nakş-i [M1 327] harîr-tahrîr kılınup, âharın zafer bu- lamadığı serâyir-i Kem tereke'l-evvelü li'l-âhir mefhûmu üzere dest-yârî-yi kalem-i şikeste-rakam ile şâyeste-i tahsîn-i erbâb-ı sıdk u yakīn ve nikât ü rumûz ve ebyât-ı hikem efrûz ve escâʿ-ı meʾnûsetü'l-istiʿmâl ve kavâfî-yi masûnatü'l-intihâl ve terâcim-i aʿyân ve tafsîl-i ahvâl-i ebnây-ı zemân ile mecelle-i mezkûre tezyîn olunup, hezâr ʿacz ü iftikār ve envâʿ-ı meskenet ü ihtikār ile takdîm-i hâk-i pây-i Şehriyâr-ı İskender-temkîn kılındı. Cenâb-ı Kādir-i mutlak serîr-i Saltanat'a her vechile zîb ü revnak veren Pâdişâh-ı Cem-câh hazretlerini bu makūle umûr-ı hayriyyeye her bâr muvaffak edüp, sâye-i hemâ-vâye-i cihândârîlerin mefârık-ı ʿibâd ve be-tahsîs-ı fırak-bende-i hâlisu'l-fu'âdlarında müstekarr ve envâʿ-ı âsâr-ı ʿâdâletlerin hemîşe aktâr-ı arza münteşir eyleye, âmîn. Bundan sonra tekevvün eden etvâr-ı rüzgârın tahrîrine Enverî Efendi me'mûr olup, ʿAbd-i ʿâcizin meʾmûriyyetine dek mûmâ ileyh zabt-ı vekāyiʿ-i duhûr ve iki cildden ʿibâret târîh ile ismini vekāyiʿnüvisler cerîdesinde mestûr eyledi.