Şehr-i mezkûrun on ikinci salı günü Ordu-yi hümâyûn ile ʿazîmetleri muʿtâd olan erbâb-ı hıref ü sanâyiʿ ve erbâb-ı ticâret ve bezâyiʿ alaylarını pezîrüfte-i hüsn-i nizâm ve Serây-ı hümâyûn'dan Dîvân-yolu'yla Muʿasker-i Sultânî olan Dâvud Paşa'ya varup, nasb-ı hıyâm eylediler. On dördüncü pençşenbih günü Yeniçeri Ağası, dilâverân-ı Bektâşiyân ile pîşgâh-ı Şehriyâr-ı kişver-i güşâdan alay ile mürûr edüp, Topkapu yoluyla zikr olunan sahrâda nasb olunan haymelerine nüzûl ve ferdâsı sâyir ocağlar dahi tertîbleri üzere alay gösterüp, mahall-i mezkûrda olan hıyâm-ı mansûbelerine duhûl eylediler.