Mah-ı merkūmun on sekizinci isneyn günü Sadrıaʿzam ve Serdâr-ı ekrem ve Şeyhülislâm ve sâyir vüzerây-ı ʿizâm ve Kudât-ı asâkir ve ricâl-i devlet medʿuvven Serây-ı hümâyûn'a daʿvet olunup, Sadrıaʿzam ve Şeyhülislâm Efendi hazerâtı huzûr-i fâyizu'n-nûr-i Hüsrevâne'ye duhûl edüp, ikisine dahi semmûr kürkler ilbâs olunduğundan fazla, Serdâr-ı ekrem'in miyân-ı bendi mücevher tîğ u tirkeş ile ârâste ve kallâvîsi otâğa mücevher ile [M1 325] pîrâste kılındıkdan sonra, Livâ-i saʿâdet-iltivâyı mazhar-ı “İnneke leʿalâ hulukin ʿazîm” dest-i mekârîm-peyvest-i Mülûkâne ile yed-i Serdâr-ı ekremî'ye teslîm olunup, Şehriyâr-ı vâlâ-tebâr tarafından keşîde kılınan müzeyyen esbe süvâr ve bi'l-cümle ʿulemâ ve sâyir erkân-ı devlet esvâb-ı dîvâniyyeleriyle pîş-gâh-ı Sipeh-sâlârî'de revân olarak ve Sâdât-ı kirâm havâlî-yi Livây-ı nusret-ihtivâda salât ü selâm eyleyerek Topkapu'dan çıkup, Dâvûdpaşa Sahrâsı'nda nasb olunan otâk-ı cevzâ-nitâka sâye endâz-ı şeref ü iʿzâz oldular. Bir haftadan sonra Yeniçeri ve sâyir ocağlar kānûn-i kadîm üzere birer gün tefâvüt ile Dâvûdpaşa Sahrâsı'nda nehzat ve Serdâr-ı ekrem'in hareketi günü Şehriyâr-ı kerrûbî-haslet, Muʿasker-i hümâyûn'larına zıll-efgen-i şevket olup, yemeklik içün taʿyîn olunan mahalde Serdâr-ı ekrem pây-ı ferkad-sây-ı Mülûkâne'ye ruhsâ ve baʿzı vasâyâdan sonra resm-i vedâʿ u teşyîʿ icrâ ve Serdâr-ı ekrem ordu tarafına ve Hâkān-ı zemân Serây-ı hümâyûn'a tahrîk-i bâd-pâ eylediler.