Esbâb-ı mütenevviʿa ile nakz-ı ʿahd eden Moskovlu üzerine Sadr-ı gayret-medâr, taraf-ı Şehriyârî'den Sipeh-sâlâr nasb olunduğuna binâ'en, evâsıt-ı şevvâlde kānûn üzere ʿulemâ ve meşâyih ve ricâl-i devlet, Serây-ı Âsafî'de âmâde vü hâzır ve duʿâ-yı vâfîreden sonra tûg-i hurşîd-fürûğ sahn-ı nerdübâna rekz ile zebh-i karâbîn ve iġnây-ı mesâkîn kılındı. ʿİvaz Paşa-zâde Halîl Bey Kāyim-makām Kethudâlığı hılʿati ile mümtâz ve Hâşim ʿAlî Bey Tersâne Emâneti ile ricâl-ı Ordûy-ı hümâyûn'dan ifrâz kılınup, Resmî Ahmed Efendi Rûznâmçe-i Evvel ve Sâliha Sultân Kethudâsı [M1 324] Mustafa Efendi, Matbah Emâneti ile vâsıl-ı ser-menzil-i emel oldu. Duhter-i pâkîze güher-i Hazret-i Pâdişâh olan Mihrişâh Sultân, hırâmân-ı serâbistân-ı cinân olup, Lâleli'de vâkiʿ türbe-i latîfede defn-i hâk-i ʿitrnâk oldu. Sadrıaʿzam Kethudâsı ʿÖmer Efendi, bîmâr ve mütehammil-i aʿbâ-i seferiyye olamayacağı be-dîdâr olup, Mîrahûr-ı Evvel bulunan Ahmed Ağa Kethudâlık mesnedine takrîb ve Cebeci-başı nasb olunan İbrâhîm Paşa-zâde Mustafa Bey Büyük Mîrahûrluğ'la tatyîb ve Cebeci-başılık ile Ocak Kethudâsı Mehmed Ağa tatrîb olunmuşiken, birkaç gün murûrunda vefât edüp, Cebeci-başılık-ı esbakı Mustafa Ağa'ya ve Silahdâr Ağalığı, Hasan Ağa'ya ve Arpa Emâneti, Hasekî Mustafa Ağa'ya tevcîh olundu. Edirne Pâyesi'yle kesb-i mâye eden 'Arab-zâde Ahmed ʿAtâullah Efendi, Şâm-ı şerîf Kazâsı'yla mâlik-i nisâb-ı hubûr ve Galata Kazâsı'yla, Ebulhayr Hasan Efendi nâyil-i sürûr oldu. Defterdâr-ı Şıkk-ı Evvel olan ʿAtıf-zâde ʿÖmer Efendi, dağdağa-i seferden tefâʿus ve Baş-muhâsebeci olan İbrâhîm Efendi o makām-ı bülend ile teneffüs eyledi. Derbendler Başbuğu olan ʿAli Paşa'nın Vezâret'e liyâkati mübeyyen olduğundan, mâh-ı zilkaʿdede câme-i istiʿdâdı tırâz-ı Vezâret ile müzeyyen kılındı.