meşîhatlerine târîh vâkiʻ olmuşdur. Balâda tafsîl olunduğu vech üzere teveccüh-i Meşîhat hılâlinde haste bulunup, ferve-i beyzâ hânelerine irsâl olunmak zemânlarında vukûʻ bulan keyfiyyatdandır. Yetmiş beşde mesnedinden infisâl ile mümtehan ve nâ’î-yi 'ani'l-vatan olmuşidi. Bir müddetden sonra Âsitâne-i saʻâdet'e 'avdet ve evkātını vakf-ı tâʻat-ı cenâb-ı Ahadiyyet eyleyüp, seksen zilka‘desinde mükerreren Şeyhuislâm, yetmiş iki cumâdelâhıresinde ‘âzim-i semt-i dâru's-selâm oldu. Müşârun ileyhin çîre-desti himmetiyle nüvişte olan kıtaʻât-ı taʻlîk, müsellem-i erbâb-ı tedkīk olup, şîve-i hattına İrâniyân dil-dâde ve cevdet-i kalemine hoş-nüvîsân-ı rüzgâr-ı ‘âşık-ı üftâde olup, kâşâne ve kusûr-i şâhâne eser-hâme-i Behzâd-nümâyişleriyle hem-nakş-ı nigar-hâne-i çîn ve sevâd-ı midâd-gülün mûşikâfları veseme-i âb-rûy-i hûr-i ‘în olup, Sultân Bâyezîd Câmiʻi dâhilinde bir kitabhâne-i bedîʻu'l-inşâ binâ ve derûnuna nefâyis-i kütüb imlâ ve bâliğan mâ belağ vakfını tertîb ile ihrâz-ı dest-mâye-i senâ edüp, ekser mahallerde bulunmayan kütüb-i nâdire, o kitabhânede mevcûd ve izdihâm-ı talebe ile dâyimâ istifâde-i 'ulûm olunduğu meşhûd olup, hâric-i sûrda zât-ı muʻallâ-sıfatlarına mesned olan çeşme-sâr nüzhet-gâh-ı sıgār u kibârdır. Mahdûm-i meʻâlî lüzûmları hâlâ Reʼîsü'l-‘ulemâ Mehmed Emîn Efendi cenâbları, birkaç seneden berü kütüb-i girân-behâ iştirâ [M1 322] ve pederleri merhûmun kitabhânesine vazʻ ile hakk-ı bünüvveti icrâ etdiklerinden fazla talebe ve sâyirin su'âl edüp, kitabhânede bulunmayan kitabları ilâ yevminâ hâzâ yâ 'aynen veyâ tahrîren tedârük ü izâfe eyledikleri meşhûr u mütevâtirdir.