Müşârun ileyh Silivri-kapusu dâhilinde Yaylâk semtinde sâkin Solak-başı el-Hâc Mustafa Ağa'nın semere-i fu'âdı ve reyhân-ı reyʿân-gülistân-ı murâdı olup, terbiye-i feyz-i kadr ile mümeyyiz meyân-ı huşk u ter oldukda, pederlerinin binâ-kerdesi olan Medrese İbtidâ-i Hâric'le Ebe-zâde ʿAbdullah Efendi Meşîhati'nde bunlara müyesser olunmuşidi. Bir müddetden sonra Müfettiş-i Haremeyn ve nesak-sâz-ı Evkāf-ı Bukʿateyn-i mübâreketeyn olup, devre-i muʿtâdesin [M1 321] ikmâl ile Halebü'ş-şehbâya Hâkim ve hengâm-ı fetretde zûr-bâzû-yı ser-keşân ile mansıbı alınıp, dört mâh mürûrunda Galata Kazâsı'yla hadşe-i derûndan sâlim olmuşidi. Bundan sonra Mısr-ı Kāhire mansıbı ile be-kâm ve Medîne-i münevvere Kazâsı'na neyl ile zâ'ir-i Ravza-i Seyyidü'l-enâm ve ruhsây-ı ʿatebe-i Beytü'l-Harâm olup, baʿdehû İstanbul Pâyesi'yle vâye-dâr ve altmış dokuz şaʿbânında Sadâret-i Anadolu ile kâm-kâr ve yetmiş birde Rumeli Sadâreti'yle tatyîb ve altı mâhdan sonra Mağnisa'ya tagrîb olunmuşidi. Bir seneden sonra vâreste-i kayd-ı gurbet ve vâsıl-ı Âsitâne-i saʿâdet olup, yetmiş üçde Çelebi-zâde vefât ve ʿazm-i dâr-ı mükâfât eyledikde, târîh-i nasbları olan fazl-ı Rabbânî ile nâyil-i dest-mâye-i kâm-rânî ve Cumâdelâhıre selhinde Şeyhülislâm ve kürre-güşây-ı muʿdilât-ı umûr-ı hâss u ʿâmm oldular. Halîl Resâ Efendi'nin nazmen: "Ola dâyim Veliyyü'd-dîn Efendi Sadr-ı Fetvâda” (اوله دايم ولی الدین افندی صدر فتواده) ve Müstakīm-zâde'nin neşren;