Defterdar-ı Şıkk-ı Evvel Sârim Efendi'nin seyf-i lisânıyle erbâb-ı mesâlih, mecrûh ve her ne kadar tahsîlât-ı mîrîde saʻyi zâhir ise dahi, huşûnet-i tab'ı sebebi ile makdûh ve gayr-i memdûh olduğundan, mesned-i defterîden ibʻâd ve Çavuş-başı olan 'Atıf-zâde ‘Ömer Efendi o mansıb-ı kesîru'l-îrâd ile ber-murâd ve Çavuş-başılık ile Yesrî Ahmed Efendi ve Büyük Tezkirecilik ile İbrâhîm Efendi ve Küçük Tezkirecilik ile ‘Abdurrezzâk Efendi ve Mektûpçuluk ile Süleymân Feyzî Efendi ısʻâd olundu. Bostâncı-başı olan ʿAli Ağa maʿzûl ve Hasekî Ağa olan Yaʿkūb Ağa yerine mevsûl ve Bostâncılar Oda-başısı İsmâʿîl Ağa, Edirne Bostâncı-başılığı ile nâyil-i eʿazz-i me'mûl oldu. Sadr-ı sâbık Silahdâr Hamza Paşa, Hanya'ya ʿazîmet içün Gelibolu'da mukīm iken, ʿilleti müzdâd ve ʿâzim-i ʿadem-i âbâd oldu. Cumâdelâhırenin yirmi ikinci pençşenbih günü Nasr-ı ceng ve Feth u zafer isimleriyle müsemmâ iki kıtʿa kalyon suhûletle deryâyâ nâzil ve derûn-i Şehriyârî'de inbisât hâsıl olup, Sadrıaʿzam ve Şeyhulislâm cenâblarına birer ferve-i semmûr ile iltifât ve Sadrıaʿzam dahi Tersâne Emîni ile sâyirlerini hilʿa-ı zâhirât ile nâyil-i meserrât eylediler. Şehr-i recebü'l-ferdin on ikinci günü Haremeyn-i muhteremeyn fukarasına irsâli muʿtâd olan Surre-i hümâyûn, Surre Emîni olan Saʿîd Paşa Hazînedârı el-Hâc Hasan Ağa'ya teslîm ve Üsküdar'a imrâr ve birkaç günden sonra mûmâ ileyh cânib-i Hicâz'a tesyâr olundu. Ak-deniz muhâfazasına meʾmûr Donanma-yı hümâyûn'un vakt-i şitâ hulûlüyle deryâda geşt ü güzârı muhâtara ve ʿavdeti husûsunu Kapudan Paşa muhâbere etmişidi. Tahsîl-i ruhsat ʿakabinde Donanma-yı hümâyûn'u mashûben bi's-selâme Âsitâne'ye getürüp, muʿtâd üzere huzûr-i Sadr-i surûşî-hasletde telebbüs-i hilʿat ve sefâyin-i donanmayı mersây-ı tersâneye idhâl ile kesb-i râhat eyledi. Eflâk Voyvodası Aleksandr'a bi'l-iktizâ tebdîl ve Ligor Voyvoda yerine tavsîl olundu.