Müşârun ileyh pîr-i fânî ve bâliğ-i nisâb-ı zindegânî olup, bu defʿa vücûduna târî olan maraz u sekam, ʿilâve-i derd-i şeyhûhat ü herem olup, cumâdelâhırenin üçüncü salı günü kazây-ı bî-intihây-ı âhirete refʿ-i ʿalem ve minassa-i gurfe-i Cennet-i aʿlâya vazʿ-ı kadem eyledi. Ferdâsı Sadrıaʿzam ve sudûr-ı ʿulemâ, Koca Mustafa Paşa Câmiʿi'nde nemâzlarını edâ ve Kasaba-i Hazret-i Hâlid hâricinde Otakçılar kurbunda Murâd Efendi Zâviyesi'nde o ʿakīle-i dâru'l-hizâne-i kemâli aʿyun-ı ağyârdan ihfâ eylediler. Üç defʿa Rumeli Sadâreti'ne ziynet veren Re'îsü'l-ʿulemâ Pîrî-zâde Osmân Efendi, maʿiyyet-i cenâb-ı Sadâret-penâhî ile rû-mâl-i ʿatebe-i Şehinşâhî olup, hilʿat-i beyzây-ı Meşîhat ile hâyiz-i rehîne-i sürûr-ı nâ-mütenâhî oldu.