Müşârun ileyhin tavr u hareketinden rehâvet ü futûr istidlâl ve sefere el vermiyeceği muktezây-ı karîne-i hâl olduğuna binâ'en, ʿazl ve Fındıklı'da vâkiʿ çiftliğine irsâl olundu. Bergos Kasabası'nda mukīm olan Kırım Girây Hân ʿan-asl maʿreke-ârâ ve arbede cû ve talebkâr-ı sît-i bülend ve nâm-nigû olmağla Âsitâne-i saʿâdet'e daʿvet ve Dâvud Paşa'da yemeklik tertîbi ile ihzâr-ı levâzım-ı ziyâfet ve Sadrıaʿzam ile hem-ʿinân-ı mürâfakat olarak Bâb-ı ʿâlî'ye ve celse-i hafîfeden sonra Süleymâniyye kurbunda ferş olunan Mollacık-zâde konağına ʿazîmet eyledi. Cumâdelâhırenin yedinci günü müşârun ileyhimâ ʿatebe-i felek-mertebe-i Şâhâne'ye rû-mâl ve sefere dâyir baʿzı kīl ü kālden sonra Hân-ı ʿâlîşân'ın bir kıtʿa sar-gūc ile ser-i iftihârı ve bir kabza mücevher hançer ve incûli tirkeş ile meyân-bendi tezyîn ve bir sevb-i semmûr ve bir donanmış at ile kadr u rifʿatı hemser-pervîn kılındı.