Ânifen beyân olunduğu üzere Rusya Devleti'nin Âsitâne-i saʿâdetde mukīm olan Kapu Kethudâsı huzûr-i Âsafî'ye ihzâr ve bâlâda mestûr-i fermân-ı hümâyûn buyurulan husûslar gereği gibi kendüye ifâde ü tefhîm ve istintâk olundukda: “Benim murahhaslığım mahdûddur bu mâddelere murahhas değilim. Devlet-i ʿaliyye tarafından iki ay kadar zemân mehil verirlerse devletim tarafına tahrîr ederim ne gûne cevâb gelürse hâkipâyinize ifâde ederim. Sefer husûsunda sultânım aʿlemdir” deyü cevâb ve mukaddemâ verdiği takrîr kâğıdlarında: “Leh Memleketi'ne tesyîr olunan Moskov askeri yedi bin mikdârıdır” deyü tahrîr etmişiken, hâlâ yirmi yedi binden mütecâviz olduğunu ve Balta nâm mahalde harb ü kıtâl vukūʿuyla ehl-i İslâm'dan niçe kimseleri şehîd etdiklerini dahi ikrâr u iʿtirâf eyleüp, bu cevâbdan murâdı Devlet-i ʿaliyye'yi iğfâl ve devleti tarafından cevâb vürûduna intizâr ile işgāl etmek idüği zâhir ü âşikâr olmağla, kāʿide-i devlet üzere Moskov Memleketi'nde bulunan Devlet-i ʿaliyye tüccârına zarar u ziyân erişmeyüp, emn ü selâmetle ʿavdetlerine dek firâr etmemek içün Kapu Kethudâsı mesfûr on nefer etbâʿiyle Yedikulle'ye [M1 319] irsâl ve anda meks ü ârâm etmesi bâbında sâdır olan musahhah fermân-ı Âsafî mûcebince habs olunup, mâh-ı merkūmun yirmi altıncı sebt günü bi'l-cümle vüzerây-ı ʿizâm ve ʿulemây-ı zevi'l-ihtirâm ve Ocak ağaları ve zâbıtân ve sâ'ir ricâl-i Devlet-i ʿaliyye, huzûr-i lâmiʿu'n-nûr-i hazret-i Şehriyârî'de ictimâʿ ve evvel-behâr-ı huceste-âsârda ʿAlem-i nusrat-tev'em-i hazret-i Fahr-i ʿâlem sallallâhü teʿâlâ ʿaleyhi ve selem sâyesinde Vekîl-i mutlak-ı kavîyyü'l-himem hazretleriyle maʿan vüzerây-ı ʿizâm ve mîr-i mîrân-ı kirâm ve Dergâh-ı ʿâlî gedüklü zuʿamâsı ve erbâb-ı tîmâr ve sâyir tavâyif-i asâkir-i zafer-te'sîr bi-ʿinâyeti'llâhi'l-Meliki'l-Kadîr sefer-i hümâyûn-i nusret-makrûna ʿazîmet etmek bâbında, fâtiha-i şerîfe kırâ'etiyle duʿâ vü senâ olundu.