Mâdde-i mezkûre muʿzamât-ı vekāyiʿ-i devletden olup sûret-i meclis [M1 317] ʿaynî ile bu mahalle kayd olundu. Devlet-i ʿaliyye-i ebediyyü'l-istikrâr ile Rusya Devleti beyninde münʿakid olan musâlaha şurûtuna, taraf-ı Devlet-i ʿaliyye'den riʿâyet ve hifz u vikāyetine ihtimâm ü dikkat olunurken, mukaddemâ beyân olunduğu üzere Moskov Devleti tarafından Leh cumhûruna nasb olunan krala cumhûr-ı mezkûrdan taraf-ı hılâfda bulunan fırkaları tebaʿiyyet ü itāʿat etdirmekiyçün, Lehlü tâ'ifesinin hifz-ı nizâmı behânesiyle, mugāyir-i şurût-ı ʿahdnâme Leh Memleketi'ne top ve cebehâne ile ʿasâkir-i vâfire sevk ü tesyîr edüp, şurût-ı serbestiyyet Leh'i cebren ve kerhen ilgâ ve kendi istediği gibi nizâm-ı cedîd ihtirāʿıyla ʿinâd ü muhâlefet üzere olanları katl ü iʿdâm ve emvâl ü eşyalarını yağmâ vü gâret misüllü gûnâ gûn fezâhata cesâret eylediğinden gayri, Moskov tâ'ifesinin bu hareketlerinden maksûd-ı aslîsi, Leh Memleketi'ni ber âverde-i kabza-i tasarruf ve Lehlü tâ'ifesin kendüye tebaʿiyyet etdirdikden sonra, memâlik-i İslâmiyye'ye dahi sû'-i kasd etmek fikr-i fâsidinde olduğu âşikâr olmağla, Leh Memleketi'nden askerini ihrâc etmekiyçün kirâren ve mirâren kendüye tenbîh ü te'kîd olunmuşiken, ʿadem-i kabûlde ısrâr ve bundan mâʿadâ Leh cûmhûrundan baʿzıları ırz u cânını tahlîs zımnında, Devlet-i ʿaliyye hudûduna firâr eylediklerinde, taʿkīb ederek hudûd-ı İslâmiyye'ye gelmeleriyle, hudûdda olan reʿâyâ ve muhâfazaya me'mûr asker mütevahhiş olup, ol vechile ihtilâl-i memlekete bâʿis ve ʿale'l-husûs şehâmetlü celâdetlü Hân-ı ʿâlişân hazretlerinin hâss-ı mahsûslarından olan Balta nâm mahalle cebehâne ve top ve tüfeng ve sâyir edevât-ı harb ü ceng ile gelüp, ehl-i İslâm üzerlerine hücûm ve muhârebe vü mukātele edüp, ehl-i İslâm'dan niçe kimesneleri şehîd ve mahall-i merkūmu ihrâk ve tahrîb edüp, bunlara mümâsil niçe niçe hılâf-ı şurût-i ʿahid-nâme-i hümâyûn nakz-ı ʿahdi mûcib harekâta tasaddî eyledikleri, huzûr-i fâ'izü'n-nûr-i hümâyûnda bi'l-cümle vüzerâ’-i ʿizâm ve ʿulemâ'-i fihâm ve yeniçeri ve cebeci ve topçu ve sipâh ve silahdâr ağaları ve sâ'ir zabıtân-ı asker ve ricâl-i Devlet-i ʿaliyye ile müzâkere vü müşâvere olundukda, Moskov tâ'ifesinin bu makūle hareketi, sarâhaten nakz-i ʿahdi mûcib olmağla, şerr u şûrundan bilâd ü ʿibâd teʾmîn olunmağiyçün üzerine sefer olunmak emr-i meşruʿ olduğuna ʿulemâ’-i aʿlâm bi'l-ittifâk cevâb verüp, lâkin sâhib-i devlet [M1 318] hazretleri mesned-i Sadâret'i henüz teşrîf etmiş bulunmalarıyla, huzûr-i ʿâlîlerine Moskov Kapu Kethudâsı'nı ihzâr ve Moskov askerinin Leh Memleketi'ne duhûl ve hudûd-i İslâmiyye'ye bu makūle cesâretleri ehl-i İslâm'ın ʿadem-i emn ü râhatlarını mûcib olmağla, fîmâ baʿd Leh cumhûruna kral intihâbı ve mezheb nizâʿı ve âhar behâne ile sevk u tesyîr eylediği askeri, Leh Memleketi içinden bi'l-külliyye ihrâc ve Lehlü'nün memleketlerine ve umûruna bir dürlü taʿarruz etmeyüp, Lehlü kemâ fi'l-evvel serbestiyyetleri üzere kalması ve mukaddemâ verilen ʿahid-nâme-i hümâyûn mûcebince beynehümâda münʿakid sulh u salâhın şurûtuna bi-temâmihâ riʿâyet etmek üzere taʿahhüd edüp, ve bu vechile müttefikleri bulunan Danimarka ve Prusya ve İngiltere ve İsveç devletleri tekeffül ve tasdiknâme verirlerse fe-bihâ ve illâ nakz-ı ʿahd Rusyalu tarafından zuhûr etmekle, ber-muktezâ-yı şerʿ-i şerîf üzerlerine sefer-i hümâyûn vukūʿı musammem ve muhakkak olduğunu ifâde etmek üzere karâr verildi.