Mûmâ ileyhin tavr u hareketi pesen-dîde-i Şehriyâr-ı bende perver ve taşralarda hizmete yarayacağı mekşûf-i zamîr-i enverleri olduğuna binâʿen, mâh-ı saferu'l-hayrda rütbe-i vâlâ-yı Vezâret ihsânıyla, şânı terfîʿ ve Bozok ve Yânya sancâkları ilhâkıyla Hotîn muhâfazası ʿuhde-i kifâyetine tevdîʿ olundu. Münhal olan büyük Mîrahûrluk ile Çavuşbaşı bulunan el-Hâc Ahmed Ağâ mükerrem ve mansıb-ı mezkûr ile sâbıkā Anadolu Muhâsebecisi ʿAtıf-zâde ʿÖmer Vahîd Efendi dil-şâd u hurrem oldu. Gurre-i rebîʿulevvelde Anadolu Eyâleti, sâbıkā Aydın Muhassılı Vezîr Silahdâr Hamza Paşa'ya ve Aydın Sancağı ilhâkıyla Bender Muhâfazası, selefi Vezîr el-Hâc Hüseyin Paşa'ya ve Kefe Eyâleti bâ-ibkā-yı Vezâret Kalʿa-i cedîde muhâfazası şartıyla, Vezîr Süleymân Paşa'ya ve Musul Eyâleti, sâbıkā Diyâbekir Vâlîsi Vezîr Hüseyin Paşa'ya ve Diyârbekir Eyâleti, ʿAbdu'l-celîl-zâde Vezîr Mehmed Emîn Paşa'ya ve Kangırı Sancağı, sâbıkā Kars Muhâfızı Vezîr ʿAbdî Paşa'ya ve Cidde Sancağı, Vezîr Râkım Mehmed Paşa'ya tevcîh olundu.