Leh Kralı mukaddemâ hâlik olup Leh cumhûru fırak-ı müteʿaddideden mürekkeb olmağla, bir fırkası moskovluya ilticâ ve mürâcaʿat ve Çâriçe'nin inzımâm-ı re'y ü maʿrifetiyle kral nasbına mübâderet eyleyüp, tarafdârlar kral-ı cedîde münkād ve mutāʿ ve muhâlifler gerden-pîç imtinâʿ olmuşlar idi. Moskov Çâriçesi zâhiren Lehlü'nün serbestlik şurûtunu vikāye ve bâtinen nasb-gerdesi olan kralı himâye ve giderek baʿzı ağrâzının husûlüne kesb-i dest-mâye zimnında vâfir süvârî ve piyâde ve sâyir levâzım-ı muhârebe ile müteʿayyen cenerâllerinden birini Leh'e idhâl eylediği serhâdlerde kâyin vülât ü hükkâm taraflarından südde-i saʿâdete ʿarz olunup Sugûr ve Tuhûm'da vâkiʿ kılâʿ ve hisânâtın muhâfaza [M1 313] ve istihkâmı muvâfık-ı hazm ü ihtiyât olduğuna binâ'en, Bender Muhâfızı Vezîr el-Hâc Hüseyin Paşa ve Hotîn Muhâfızı Vezîr es-Seyyid Halîl Paşa ve Özi Muhâfızı Vezîr Mustafa Paşa maʿiyyetlerine ikişer bin nefer mîrî piyâde ve dört bin mikdârı yeniçeri ve cebeci ve topçu mühimmât-ı vâfiye ile taʿyîn ve zikr olunan meʿâkıl tahsîl olunduğundan gayrı, beyne'd-Devleteyn vukūʿ bulan mükâtebe bir megzây-ı: Fe inne'n nâre min ʿûdeyni tüzkâ Ve inne'l-harbe evvelühâ kelâmü muhârebeye müncer olmak ihtimâliyle zehâyir ve beksimâd ve sâyir zâd ü zevâd ve taʿmîr-i kanâtir ve tesviye-i meʿâbir bâbında etrâf ü eknâfa neşr-i evâmir kılındı.