Bosna hudûdunda vâkiʿ Karadağ ehâlîsi reʿâyâ-yı devletden maʿdûd ve sâyebân-ı emn ü emân-ı saltanat-ı seniyye üzerlerine dâyimâ memdûd iken, menâʿat-ı mekân ve baʿzı ruhbân ifsâdıyla ʿâric-i zirve-i tuğyân olduklarından gayri, bir şahs-ı tebehkâr cebel-i mezbûrde istikrâr ve o havâlîde bulunan ehl-i İslâm'ı dağlı iʿâneti ile ızrâr eylediğini Bosna Vâlîsi ve o taraf kazâların hükkâmı ve zâbıtânı işʿâr etmişleridi. Şahs-ı mesfûru ve kendülerine taʿlîm-i şerr u-şûr eden [M1 312] râhib-i makhûru teslîm ve istîfâ-yı cerâyim-i sâlife ile kemâ fi'l-evvel cizye-i şerʿiyyelerini edâ etmedikleri sûretde ber-mûceb-i fetvâ ricâli makhûr ve nisvân ve sıbyânı me'sûr olacağı mukaddemce ifade olunup, pend-pezîr olmadıkları ʿarz-ı pâye-i serîr-i Devlet-masîr kılındıkda, Bosna Vâlîsi Vezîr Silahdâr Mehmed Paşa ve Rumeli Vâlîsi Vezîr Mehmed Paşa eyâletleri dâhilinde olan Mîr-i mîrân ve erbâb-ı tımâr ve zeʿâmet ve sâyir harb ü darb askeriyle iki koldan üzerlerine me'mûr kılındı.