Bir zemândan berû Dârü's-saʿâde ağaları'na İmâm ve nazar-ı iltifâtlarıyle nâyil-i merâm olan Altmışlı Müderrisi Girîdî İbrâhîm Efendi, hâlâ Dârü's-saʿâde Ağası Beşîr Ağâ'nın sû'-i mîzâcına vâkıf ve kendi tabîbi olan bir şahs-ı mechûlü'l-hâli muʿarref olup, tahsîl-i ruhsat ʿakabinde mezbûru ihzâr ve bir şerbet tertîb ve istiʿmâl ʿakabinde ağa-yı müşârun ileyh intikāl ve civâr-ı rahmet-i Îzed-i zü'l-Celâl'e irtihâl eyledi. İmâm-ı merkūm tehdîd olundukda, tabîbi irâ'e ile tebrie-i zimmet ve tabîb istintâk olundukda, verdiği şerbetin eczâsını deftere mübâderet ve bu hâl ile ikisinin dahi te'dîb u gûşmâli lâzım-ı maslahat ʿadd olunup, İmâm'ın medrese kaydı terkīn u ilgâ ve tabîb-i mezkûr iclâ olunup, fîmâ baʿd bilâ-imtihân etibbâ feth-i dükkân etmemek üzere isdâr-ı fermân ve hakîm-başılar huzûrunda mehâretleri maʿlûm olanlar ibkā ve yedlerine Ru'ûs-i hümâyûn iʿtâ ve nâdân ü câhil olanların dükkânları tesmîr ve muntasıh olmadıkları hâlde seyf-i siyâsetle iʿdâm ve tedmîr olunacağları beyânıyle, takdîm-i şart-ı enzâr [M1 311] u tahzîr olundu.