Müşârun ileyh Hüdâvendigâr-ı cennet-mekân Sultân Ahmed Hân hazretlerinin vezîr-i müstakilli olan İbrâhîm Paşa merhûmun semere-i fevâdı ve Gülşen-i emelinin serviser-âzâdı olup, o zaman-ı meserret-iktirânda rütbe-i refîʿa-i Vezâret'le ber-murâd ve dâmâd-ı Şehriyâr-ı vâlâ-nijâd olmuşidi. ʿİllet-i hâ'ile-i sarʿa ibtilâsı hasebiyle, rûhânî vü cismânî tertîb olunan ʿilâc ve devâ hazîneler ifnâ edüp, o derd-i cân-hırâşdan halâs ve o beliyye-i tâkat-fersâden melce' ve menâs bulamayup, pederi vefâtından sonra Beşiktaş'a karîb Yahya Efendi pîş-gâhında vâkiʿ sâhil-hânede karâr ve bir kimse ile musâhabe ve mücâleseye kudreti olmayup kendi hâliyle imrâr-ı leyl ü nehâr eyler idi. Taraf-ı Devlet-i ʿaliyye'den baʿzı muʿtemed kimse taʿyîn ve pederi evkāfının nizâmıyle umûr-ı lâzimesin tehvîn eyler idi. İş bu muharremü'l-harâmın yirminci günü geşt-gîr-i ecel yedinde masrûʿ ve mürg-i rûhu kafes-i tenden menzûʿ oldu.