Girid Eyâleti ile Hanya tevcîh olunan Sadr-ı esbâk Hamza Paşa, manzûr ve selefi es-Seyyid el-Hâc Ahmed Paşa, Eğriboz Sancağı muhâfazasına me'mûr ve Vezîr Feyzullah Paşa'nın Hanya Sancağı'yla kalb-i münkesiri mecbûr ve Rakka Eyâleti'yle Çelik Paşa Hazînedârı mîr-i mîrândan ʿAli Paşa mesrûr oldu. Ahısha hânedânından Vezîr Hasan Paşa'nın o havâlî ile kemâl-i ülfeti olduğundan, mukaddemâ Çıldır Eyâleti'ne Vâli ve Gürcistân'ın nizâm-ı hâli süpürde-i ʿuhde-i istiklâli kılınmışidi. Zarûriyyât-ı vakt îcâbıyla ʿazl ve yerine âharı nakl lâzım geldiğinden, yine o hânedâna müntemî olup, sâbıkā Silahdâr-ı hazret-i Şehriyârî İbrâhîm Bey'e, Vezâret ve Çıldır Vâliliği ʿinâyet olunmuşidi. Ahısha'ya vusûlünde baʿzı erbâb-ı şekāvet emr ü nehyine muhâlefet ve şehirden ihrâc ile müşârun ileyhi izʿâc eylediklerine binâʾen, Erzurum Eyâleti'yle tatyîb ve Çıldır'a selefi Vezîr Nuʿmân Paşa tesrîb olunup, memleketin nizâmı ve fesâda sebeb olanların iʿdâmı, havâle-i zimmet-i ihtimâmı kılınmışidi. Müşârun ileyh dahi teksîr-i sevâd irâdesiyle Trabzon'dan bir mikdâr asker celb edüp, zikr olunan fesâd-pîşeler askerin bir mikdârını telef ve bir mikdârını cebr ile kendülerine hevâdâr ve hem-taraf eylediklerinden gayri, Nuʿmân Paşa'nın haklarında olan niyyeti ve mukaddemâ cesâret eyledikleri fesâdın vehâmet-i ʿâkibeti maʿlûmları olduğundan bir dürlü emîn olamayup, Ahısha kalʿasını zabt ve icrây-ı melʿanet [M1 310] ve feth-i bâb-ı husûmet eyledikleri müşârun ileyhe münʿakis oldukda, mütevekkilen ʿalallâh cemʿiyyetleri olan mahalle dâʾiresinde mevcûd askeriyle hecme-endâz-ı cesâret ve cemʿiyyetlerini tefrîk ile kulûb-i hâşiyelerine ilkāy-ı ruʿb u satvet edüp, bir mikdârı küşte-i tîğ-ı âteş-bâr ve kusûru firâr ve taşrada olan hevâdârlarına iltihâk eyledikleri ihbâr olundukda, üzerlerine asker taʿyîn ve iki gün ʿale'l-ittısâl âteş-i ceng ü cidâl iştiʿâl bu- lup, bi'l-âhare oldukları mahalden dahi münhezim ve bir iki mahalde dahi ceng vukūʿuyla binây-ı iktidârları münhedim olduğundan gayri, fî-mâ baʿd o makūle sâʿî-yi bi'l-fesâd olanlara iʿânet ü imdâd olunmamak üzere hâric ve dâhilde bulunanlar nezr-i girâna katʿ ve memleket-i mezbûreden bu vechile şûriş ü fitne fazl-ı hak ile defʿ olundu. Nizâm-ı mülke dâ'ir aralık aralık memâlik-i Pâdişâhî'ye evâmir-i şerîfe neşri muʿtâd olduğundan, bu defʿa dahi âsâyiş-i ʿibâd ve ʿumrân-ı bilâdı mûcib olur mukaddemâtı mutazammın etrâf u eknâfa ısdâr-ı evâmir ve neşr-i nevâhî ve zevâcir olundu. Muharremu'l-harâmda sunuf-ı âsâkirin müstahek oldukları bir kıst mevâcib teslîm-i eyâdî-i erbâb-ı revâtib kılındı.