Şevvâl'in dördüncü günü kāʿide-i Devlet-ebed müddet üzere tevcîhât vâkiʿ olup, hademe-i Bâb-ı ʿâlî ve defterdârân ve sâyir menâsıbın ekseri mutasarrıflarına ibkā olunup, fekat Büyük Rûz-nâme, Hâşim ʿAli Bey'e ve Baş-muhâsebe Sadr-ı ʿazam birâderi Ahmed Bey'e ve Anadolu Muhâsebesi Elmâs Paşa-zâde Mustafa Bey'e, Tersâne Emâneti, Resmî Ahmed Efendi'ye; Matbah Emâneti, Hâsekî Mustafa Ağa'ya; Cizye Muhâsebesi, Veliyyü'd-din Efendi'ye; Haremeyn Muhâsebesi, Şehrî İsmâʿîl Efendi'ye; Yeniçeri Kitâbeti, Defterdâr-ı sâbık İbrâhîm Efendi'ye; Arpa Emâneti, ʿİvaz Paşa-zâde Ali Bey'e tevcîh olunup, bunlardan mâʿadâ menâsıb-ı mevcûde erbâb-ı istihkāka ʿinâyet ve baʿzılarına dahi ʿatâyâ ile iʿânet olundu. Sipâh Ağalığı, Gül Ahmed Paşa-zâde Feyzî Bey'e; Silahdâr Ağalığı, Çakırcıbaşı ʿOsmân Ağâ'ya tevcîh olundu. Yevm-i mezkûrda vüzerây-ı ʿizâm tevcîhâtı dahi vukūʿ bulup, Özi Eyâleti, Vezîr Mustafa Paşa'ya; Haleb Eyâleti, mansıb-ı Tevkīʿî izâfesiyle hâlâ Tevkīʿî Vezîr Mehmed Emîn Paşa'ya; Tırhala ve Semendire sancakları Vezîr el-Hâc Hasan Paşa'ya; Aydın Muhassıllığı, Vezîr Silahdâr Hamza Paşa'ya; Hânya, Sadr-ı sâbık Hamza Hâmid Paşa'ya; Eğriboz Sancağı, Vezîr el-Hâc Ahmed Paşa'ya; Selânik ve Köstendîl Vezîr Hasan Paşa'ya; tevcîh ve sâ'ir eyâlât ü elviye mutasarrıflarına [M1 307] ibkā olundu.