Çeteci Yeğenî Hüseyin Ağa'da mehâyil-i rüşd ü reviyyet-i mahsûs ve hasâyil-i fütüvvet ve hasâfet ile me'nûs olduğundan, Rikâb hizmetlerine takrîb ve huşk-zâr-ı nihâlistân-i ikbâli sehâb-ı midrâr-ı ʿâtıfet-i Pâdişâhî ile tartîb olunmuşidi. Zâtında olan istiʿdâd yevmen fe-yevmen müzdâd ve rifʿat-ı şân ve sümmüvv-i mekân ile fâyiku'l-akrân olmasına ʿillet-i irşâd olduğundan gayri, hâl-i bedîʿu'l-faʿâlinin dâʿiresi şemʿ-i cemʿine pervâne ve o makūle rem-hûrde-i ʿikāb-ı felâkete âşiyâne olacağı mütehakkak olmağla, hakkında nazar-ı kimyâ-eser-i Şâhâne erzânî ve işbu zilkaʿdenin ikinci günü bâ-rütbe-i vâlâ-yı Vezâret Karaman Vâlîliği ile ʿâric-i süllem-i kâmrânî oldu. Çend rûz mürûrunda iktizây-ı hâl ile Karaman Eyâleti, Vezîr ʿAli Paşa'ya ve Anadolu Eyâleti müşârun ileyhe ve ʿAlâ'iyye Sancağı Vezîr Feyzullah Paşa'ya tevcîh olundu. Galata Kazâsı'yla Müftî-zâde Ahmed Efendi nâyil-i mevleviyyet ve Selânik Kazâsı'yla Bükâ'î-zâde Ahmed Efendi, hande-rûy-i beşâşet oldu. Çavuş-başı ʿAbdullatîf Bey yek-nazar-ı ʿâtıfetden sâkıt u üftâde ve mansıbı ile Kethudây-ı bevvâbîn-i hazret-i Şehriyârî Ahmed Ağa'nın derîçe-i bahtı küşâde oldu. Zilhiccetü'ş-şerîfenin onuncu gicesi kānûn-i kadîm ve de'b-i müstedîm üzere Serây-ı hümâyûn'da ictimâʿ ve inbilâc-ı subh-ı sâdıkda Hûrşîd-i talʿat-ı hümâyûn iltimâʿ edüp, erkân-ı devlet ve aʿyân-ı Saltanat tebrîk ve tehniye-i ʿîd-i adhâya şitâb ve dâmen-bûs-i Şâhâne ile fahr u şeref iktisâb eylediler. Mâh-ı merkūmun on yedinci günü Donânma-yı hümâyûn aʿdâ-yı bed-sigâli ciğer-hûn eyleyerek, Yâlı-köşkü pîş-gâhından murûr ve Kapudân-ı deryâ Vezîr Mehmed Paşa, huzûr-i mevâhib-i mahsûrda iktisâ-y-ı semmûr-i fâyizu's-sürür edüp, birkaç günden sonra imdâd-ı mürsilü'r-riyâh ile Ak-deniz'e bâd-bân-ı güşâ-yı revâh oldu. Hacıbektâş taraflarında fitne-bâş olan baʿzı evbâş-ı fukarâ ve ebnâ-i sebîli pür-bîm ü telâş eylediklerine binâ'en, Çapar-zâde Mustafa Bey üzerlerine me'mûr ve ol dahi Bâr'a süvâr-ı istiʿcâl olarak, mahall-i mezkûre ekserîsini müdemmir u makhûr ve vâfir kelle Âsitâne-i saʿâdet'e irsâl ile hizmeti meşkûr oldu.