Sükkân-ı Belde-i Tayyibe'den iken, vâkiʿ olan ihtilâl sebebi ile terk-i vatan ve ʿUrbân içinde ittihâz-ı mesken edenler ʿUrbân'ı tahrîkden hâlî olmayup fesâda hass ü iğrâ ve ağrâz-ı kâminelerini icrâ iderler idi. Savâb-dîd-i vücûh-i ehâlî ile merkūmların cerâyim-i güzeşteleri mütevârî-yi tâk-ı nisyân ve emlâk ü ʿakârları kemâ-kân kendülere terk ile Medîne-i münevvere'de iskân ve vahşetleri ülfete tahvîl ve ʿadâvetleri mehabbete tebdîl [M1 306] olundu. Medîne-i münevvere'de bâbü'l-feth ve'l-gazâ isimleriyle müsemmâ olan Bâb-ı gerdûn-kıbâb Sâlih nâm mütegallibin dest-i tesallutuyla mesdûd ve bu esnâda merkūm kazây-ı pehnây-ı hestîden nâ-bûd olup, cümlenin sevk u iltimâsıyle bâb-ı mezkûr küşâd ve kesb-i sühûletle ehâli ber-murâd kılındı. Esliha ile derûn-ı feyz-i meşhûn-i Medîne'de geşt ü güzârdan iki taraf menʿ olunmuşiken, mefkūd olan Sâlih'in hevâdârlarından iki şahs-ı zenîm kurb-i Ravza-i melâ'ik hadîmde ser-mest geşt ve birkaç adamı cerh ve baʿzı kimsenin ʿırzını şikest etdikleri ihbâr olunup, dest-beste-i ihzâr ve bekā-yı nizâm zımnında ikisi dahi ber-dâr olundu. Muhâfaza-i Medîne-i münevvere zımnında Şeyhu'l-harem bulunanlar elli nefer tâmmü's-silâh asker tedârük edüp, iktizâ eden ʿulûfelerine medâr olmak içün senevî iki bin altûn taʿyîn olunup, be-her sâl muhâsebesi ru'yet ve fazlası hıfz olunmak üzere Medîne-i münevvere'nin nizâmı hıtâm bulduğu muhâfız bulunan Cidde Vâlîsi Vezîr Ahmed Paşa tarafından ʿarz-ı südde-i vâlâ-makām kılındı.