Kudemâyı ricâl-i devlet-i ʿaliyye'den hâlâ Defter Emîni bulunan Ebûbekir Bey şaʿbânın onuncu günü dakākatü'r-rikāb olan şeyhûhat sebebi ile defîn-i turâb ve Defter Emâneti ile sâbıkā Sadrıaʿzam Kethudâsı Yûsuf Efendi kâm-yâb oldu. Mûmâ ileyh merhum Sultân Ahmed Hân “sabbet ʿaleyhi şâbîb-i rahmeti'r-Rahmân” hazretlerinin zemân-ı saltanatlarında Çukādâr Ağa bulunup mevkūfât ile çırâğ olmuşidi. On üç defʿa Nişancı sekiz defʿa Yeniçeri Kâtibi ve yedi nevbet Defter Emîni ve birkaç defʿa Anadolu Muhâbebesi olmuş, ʿömrü tabîʿî derecesine vâsıl ve vakti refâh-ı hâl ile geçmiş bir merd-i kâmil idi. Evâsıt-ı şaʿbânda sunûf-ı askerînin iki kıst mevâcibleri ihsân ve devr-i ʿakabinde Silâhdâr-ı hazret-i Şehriyârî teşrîfât-ı seniyye getürüp Sadrıaʿzam iltifât-ı Dâver-i zemân ile cezlân olundu. Mâh-ı mezbûrda sâbıkā Galata Kadısı Murâd-zâde Seyyid Ahmed Efendi, mahrûse-i Burusa Kazâsı'yla tatyîb ve Yeniçeri Ağası ʿOsmân Ağa, Kul Kethudâsı'na dil-gîr ve hakkında olan siʿâyeti resîde-i hayyiz-i te’sîr olup, mesnedinden ibʿâd ü tecnîb ve Vidin Ağalığı'yla tağrîb ve Kul Kethudâlığı'yla Zağarcı-başı Ali Ağâ tatrîb olundu.