Şehriyâr-ı bahr u berr-i duhter-i tâbende-ahterleri olan Şâh Sultân-ı ʿaliyyetü'ş-şânı gars-i yemîn-i cihân-bânîleri olan Tevkīʿî Vezîr Mehmed Emîn Paşa'ya nâmzed kılmağı tasmîm ve o Vezîr-i Âsaf-ı nazîrin kadrini bu cihetle dahi, tefhîm-i irâde-i ʿaliyyesi'nde olduğunu lâzım gelenlere ifâde vü tefhîm buyurmuşlar idi. Müşârun-ileyh şaʿbânu'l-muʿazzamın onuncu cuma günü resmen Bâb-ı ʿâlî'yi teşrîf eylediklerinde, bu haber-i hayr-ı dâfiʿu'd-dayr ile gûş-i iʿtibârı teşnîf ve sıhriyyet hilʿat-i pür behcetiyle taltîf olunup birkaç gün murûrunda ʿâdet olan nişân takımı teşrîfât defteri mûcebince tehyi'e vü ihzâr ve Bâb-ı ʿâlî'ye getürülüp, andan Serây-ı hümâyûn'a tesyâr olundu. Nişân takımının defteri Dârü's-saʿâde Ağası'na Kethudâ Bey tarafından teslîm ve ol dahi mahalline takdîm ʿakabinde nişân yağlığı boğçasını ârâyiş-i dest-i ibcâl eyleyerek, Kethudâ Bey'e iʿtâ ve ol dahi Dâmâd Paşa Kethudâsı'na verüp, taraf-ı Cihândârî'den Dârü's-saʿâde Ağası huzûrunda Kethudâ Bey'e semmûr kürk ve sâyirlere hılaʿ-ı fâhire iksâ olundu. Bâlâda zikr olunan nişân takımı bir kebîr elmâs yüzük ve bir kıtʿa elmâslı kebîr zümürrüd küpe ve bir kıtʿa elmâs ve zümürrüd incü ile müzeyyen şâl nikâb ve bir çift zümürrüd tügmelü incü âvizeli çep-râst ve bir çift elmâs bilazik ve bir kıtʿa murassaʿ ko- lanlı elmâs kuşâk ve elmâs ile müzeyyen [M1 305] bir âyîne ve bir çift elmâs ve zümürrüd ve lü'lü’-i şehvâr ve laʿl-i âbdâr ile müzeyyen filâr ve bir çift elmâs ve zümürrüd ve laʿl ve incû ile murassaʿ pâbûş kezâlik elmâs ve sâyir cevâhir ile masnûʿ naʿleyn ve pây-endâz içün üç top İslâmbol dîbâsı ve sâyir meyve ve şükûfeden ʿibâret idi. Bundan başka taraf-ı vâzıhu'ş-şeref-i Mülûkâne'ye müzeyyen esb ve bir takım şükûfe ve meyve-i ter ve şekerlemeden başka, ferkadeyn-i semâʿ-i necâbet olan Şehzāde Sultân Selîm ve Sultân Mehmed hazerâtına ve dürr-i sadef-i ʿismet olan Beyhân Sultân hazretlerine dahi şekerleme bâğçeleri ve meyve-i âbdâr ve envâʿ-ı ezhâr tertîb olunmuşidi.