İstanbul Kadısı olan Esʿad Efendi-zâde Mehmed Şerîf Efendi, kemâl-i ʿiffet ü nezâhet ile tekmîl-i müddet ve Şâm'dan maʿzûl Pâyedâr-ı Mekke [M1 304] olan es-Seyyid İbrâhîm Efendi, cümleden akdem ve İstanbul Kazâsı tarafına tevcîh olunmak musammem iken, bi'l-fi'l Medîne-i münevvereyi zabt ile maʿzûl bulunanlar daʿvây-ı evleviyyet ü rüchân ve herkes daʿvâsına ityân-ı delîl ü bürhân etmekle, defʿan li'n-nizâʿ gurre-i recebden yine İstanbul Pâyesi'yle İstanbul Kadılığı es-Seyyid İbrâhîm Efendi'ye tevcîh olunup, muʿârızlarından ʿAli Paşa-zâde ʿAbdullah Bey'e dahi recebin beşinci gününden ve Altunuçok-zâde ʿAbdullah Efendi'ye recebin on beşinden pâyeler ihsân ve Kara Halîl Efendi-zâde Ahmed Efendi dahi hasbe't-tarîk Edirne Kazâsı'yla şâdân kılındı. Müberrât-ı müstedîme ve hasenât-ı kadîme-i Devlet-i ʿaliyye'den olan Surre-i hümâyûn recebü'l-ferdin on ikinci günü Haremeyn Hazînesi'nden ifrâz ve Surre Emîni'ne teslîm olunup, Üsküdar'da birkaç gün ârâm ve umûruna nizâm verdikden sonra, hadd-i hân-ı semt-i Beytu'l-harâm oldu.