Dârü'l-iftâ'ya mülâzım olan müsevvidînin îrâdları kalîl ve hıdmetleri celîl olduğundan dank ü dîk-i mâʿâşa mübtelâ ve huzûr-i kalb ile hizmetlerin edâ edemeyüp, muhtâc-ı iʿânet-i evliyây-ı niʿamâ olmuşlar idi. Bu âna dek hâllerine nazar ile dâ'ire-i meʿâşları tevsîʿ ve nâme-i niyâz ve recâları tevkīʿ olunamayup: “Kem tereke'l-evvelü li'l-âhiri” mefhûmu üzere zîynet-bahş-ı mesned-i Fetvâ olan Veliyyüddîn Efendi cenâblarına zaʿf-ı hâlleri zâhir olduğundan, Bolu Kazâsı'nın mahsûlü mûmâ ileyhime meʿâş kayd olunmak husûsu vârid-i hâtırları olmağla, fi'l-hâl işâret ve tahsîl-i ruhsat eyleyüp, mahsûlün humusu Fetvâ emînlerine ihrâc ve bâkīsi müsevvidlere taksîm olunmak üzere tanzîm ve bu cihet ile tîregî-yi baht-ı müsevvidîn-i pertev-nazar-ı fetvâ-penâhiyle zâyil ve refâh-ı hâl ve âsâyiş-i bâlleri hâsıl olup, müşârun ileyh cenâblarının bu eser-i hayr cümle-i mehâsinlerinden maʿdûd ve ilâ hâze'l-ân o makūle ketebenin haklarında olan esbâb-ı duʿâları ʿinân-ı semâya memdûd olmuşdur.